ილიას სახელმწიფო უნივერსიტეტში ახალი ტექნოლოგიური სივრცის, უნილაბის, პრეზენტაცია გაიმართა. ღონისძიებაზე ილიას სახელმწიფო უნივერსიტეტის ასოცირებულმა პროფესორმა, სანდრო ასათიანმა, უნილაბის კონცეფციაზე ისაუბრა. უნილაბი გულისხმობს ტექნოლოგიური სივრცის მოწყობას, რომელიც შესაძლებლობას მისცემს დაინტერესებულ სტუდენტებს, სამთვიანი კურსებით დაეუფლონ თანამედროვე პროფესიებს გრაფიკული დიზაინის, პროგრამირების, პროგრამული პროექტების მენეჯმენტის მიმართულებით.

"ხშირ შემთხვევაში, ადამიანს პირველი ნაბიჯის გადადგმისთვის ვინმეს დახმარება სჭირდება. შესაბამისად, ეს იქნება სივრცე, სადაც მას სწორედ ამაში შეუწყობენ ხელს. მსგავსი ლაბორატორიები მთელ მსოფლიოში დიდი პოპულარობით სარგებლობენ. აქ ადამიანს სწავლასთან ერთად პრაქტიკული სამუშაოების განხორციელება შეუძლია. ამის ბევრი მაგალითი არსებობს: მაგალითად, Google თავიდან მაგისტრატურის სადიპლომო პროექტი იყო და Facebook საერთოდ საუნივერსიტეტო ცხოვრების დროს შეიქმნა", - განმარტავს ილიას სახელმწიფო უნივერსიტეტის ასოცირებული პროფესორი სანდრო ასათიანი.

კურსდამთავრებულ სტუდენტებს შესაძლებლობა ექნებათ, მიღებული ცოდნა პრაქტიკაში გამოიყენონ და სამეწარმეო უნარ-ჩვევები გაიუმჯობესონ.

"დღეს საქართველოში არ გვყავს შესაბამისი თანამედროვე ტექნოლოგიური ცოდნის მქონე კადრები და გვიწევს მათი უცხოეთიდან მოწვევა. „უნილაბი“ კი სწორედ ის კაუჭია, რომელიც ბიზნესსა და მეცნიერებას ერთმანეთთან დააკავშირებს. საქართველოში ძალიან ძლიერი კვლევითი პოტენციალია უამრავი მიმართულებით. ხოლო სტუდენტებს შესაძლებლობა ექნებათ, გახდნენ სტარტაპერები", - ნინო დობორჯგინიძე.

კურსების გარდა, უნილაბი ტექნოლოგიებით დაინტერესებული ახალგაზრდებისთვის როგორც საჯარო შეხვედრებს, ისე სასერტიფიკატო და დისტანციური სწავლების პროგრამებს წარმართავს.