გურჯაანის რაიონული სასამართლოს თავმჯდომარემ, დავით ნარიმანიშვილმა ძალაში დატოვა ნაციონალური მოძრაობის წევრის, დავით კირკიტაძის აღკვეთის ღონისძიება. დაცვის მხარე კირკიტაძის გათავისუფლებას და გირაოს შეფარდებას ითხოვდა, თუმცა მოსამართლემ ის პატიმრობაში დატოვა.

კირკიტაძის ადვოკატის თქმით, მოსამართლემ განაცხადა, რომ არსებობს კირკიტაძის მიმალვის საფრთხე. მისი თქმით, ამის მაგალითად მოსამართლემ მოიყვანა თბილისის საქალაქო სასამართლოს გადაწყვეტილება კირტკიტაძის სხვა საქმეზე. მისივე თქმით, კირკიტაძე ამ საქმეზე სააპელაციო სასამართლომ გაამართლა და ეს არგუმენტი არასწორია.

გურჯაანის რაიონულ სასამართლოსთან კირკიტაძის მხარადმჭერები არიან შეკრებილები და სასამართლოს გადაწყვეტილებას აპროტესტებენ. ნაციონალური მოძრაობის ლიდერი, ნიკა მელია ამას პოლიტიკურ ანგარიშსწორებად აფასებს. ის ისევ იმეორებს, რომ კირკიტაძე ივანიშვილის პირადი პატიმარია.

კირკიტაძე 17 დეკემბერს პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის დააკავეს. ის ბრალს არ აღიარებდა და პროტესტის ნიშნად შიმშილობდა.

შსს-მ პოლიციელზე თავდასხმის ბრალდებით, 18 დეკემბერს კიდევ ერთი პირი დააკავა. ასევე დააკავეს ორი პირი ოპოზიციაზე თავდასხმის ბრალდებით, ხოლო ერთი პირი შსს-ს ქონების დაზიანების მუხლით.

დაპირისპირება ველისციხეში

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღვრულ ადგილზე გადაიყვანდნენ.

გაერთიანებული ოპოზიციის პოზიციით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდავს. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.

18 დეკემბრიდან გაერთიანებული ოპოზიცია "უწყვეტ" აქციებს აანონსებს. გრიგოლ ვაშაძის განცხადებით, საქართველოს ხელისუფლებამ,მოპარული არჩევნების შემდეგ მოქალაქეების კონსტიტუციური უფლებები შეზღუდა