პარლამენტის გენდერული თანასწორობის საბჭო უმრავლესობის წევრის, ეკა ბესელიას პირადი ცხოვრების ამსახველ კადრებს გავრცელებიდან მეოთხე დღეს გამოეხმაურა. 28 იანვარს სოციალურ ქსელებში პოლიტიკოსის პირადი ცხოვრების ამსახველი კადრების გავრცელების შესახებ ინფორმაცია დეპუტატმა, დავით ჭიჭინაძემ გაავრცელა.

პარლამენტის გენდერული თანასწორობის საბჭოში 17 წევრია, მათგან 12 საპარლამენტო უმრავლესობიდან არის, მათ შორის თავად ეკა ბესელიაც. გენდერული საბჭო 14 ქალითა და 3 კაცითაა დაკომპლექტებული.

გენდერული თანასწორობის საბჭო გმობს მსგავსი მეთოდების ქალი პოლიტიკოსების დისკრედიტაციის იარაღად გამოყენებას და მხარს უჭერს ასეთი ქმედების წინააღმდეგ წამოწყებულ ნებისმიერ კამპანიას.

"საგულისხმოა, რომ მსგავსი მეთოდებით განსაკუთრებით აქტიურ, წარმატებულ ქალებს ებრძვიან და ცდილობენ მათ განდევნას საჯარო სივრციდან. ეს ხაზს უსვამს დანაშაულის დისკრიმინაციულ ხასიათს, რომელიც ზიანს აყენებს არა მხოლოდ კონკრეტულ მსხვერპლებს, არამედ აზარალებს ჩვენს საზოგადოებას", — ნათქვამია საბჭოს განცხადებაში.

საბჭოს მიაჩნია, რომ დაუშვებელია მსგავს ფაქტებზე თვალის დახუჭვა და საზოგადოებაში დაუსჯელობის სინდრომის გაჩენა.

"მოვუწოდებთ სამართალდამცავ ორგანოებს შესაბამისი ყურადღება გაამახვილონ დანაშაულის დისკრიმინაციულ ხასიათზე და უმოკლეს ვადებში გამოავლინონ და პასუხისგებაში მისცენ ყველა დამნაშავე პირი", — აღნიშნულია განცხადებაში.

ეკა ბესელიას ინფორმაციით, 27 იანვარს მიაწოდეს ინფორმაცია, რომ სოციალურ ქსელში პირადი და ოჯახური საიდუმლოების უკანონო ჩანაწერი ვრცელდება. ეს პირველი შემთხვევა არაა, როცა ინტერნეტში პოლიტიკოსი ქალების პირადი ცხოვრების ამსახველი კადრების გავრცელებაზეა საუბარი. 2016 წლის 11 მარტში ერთ-ერთი პოლიტიკური პარტიის ლიდერისა და ყოფილი მინისტრის პირადი ცხოვრების ამსახველი მასალა გავრცელდა. მალევე, 14 მარტს მუქარის შემცველი ვიდეოკადრები გავრცელდა. ვიდეომასალა მოქმედი ჟუნრალისტებისა და პოლიტიკოსების მიმართ ჩანაწერების გავრცელების მუქარას შეიცავდა, თუ ისინი არ დატოვებდნენ თანამდებობებს.

ამავე თემაზე: