"მივესალმები თუ კობახიძე ბოლომდე ჩაყვება ამ საქმეს, მთავარია ბოლომდე არ გადაყვეს", — ასე გამოეხმაურა პარლამენტის დეპუტატი, გედევან ფოფხაძე სოციალურ ქსელში დეპუტატ ეკა ბესელიას პირადი ცხოვრების კადრების გავრცელებასთან დაკავშირებით.

"მე არავის ვემუქრები, არ მაქვს ეგ ტონალობა, მაგრამ მგონია, რომ ყველა პოლიტიკოსი სოლიდარული უნდა ვიყოთ მაგ საკითხში და შევთანხმდეთ იმაზე, რომ არ შეიძლება შენს კოლეგას ვიღაც ასეთი ფორმებით თავს ესხმოდეს და შენ კითხვის ნიშნებით საუბრობდე საჯარო სივრცეში. ასეთი სულელური არგუმენტები არ არის პოლიტიკოსისა და კეთილსინდისიერი ადამიანის არგუმენტები", — აღნიშნა ფოფხაძემ გადაცემა 360 გრადუსში.

კადრების გავრცელების შესახებ 28 იანვარს გახდა ცნობილი. შინაგან საქმეთა სამინისტრომ საქმის მოკვლევა უკვე დაიწყო. აღნიშნულს გამოეხმაურა თვითონ ბესელიაც და თქვა, რომ მის წინააღმდეგ მორალური ტერორი მიმდინარეობს. ღია წერილში მან მოუწოდა ქალებს პოლიტიკაში მოვიდნენ და არსებული რეალობის შესაცვლელად იბრძოლონ.

პარლამენტის თავმჯდომარემ, ირაკლი კობახიძემ განაცხადა, რომ პირადი ცხოვრების ამსახველი კადრების გასაჯაროების გამოძიებას ბოლომდე მიყვება.

ეს პირველი შემთხვევა არაა, როცა ინტერნეტში პოლიტიკოსი ქალების პირადი ცხოვრების ამსახველი კადრების გავრცელებაზეა საუბარი. 2016 წლის 11 მარტში ერთ-ერთი პოლიტიკური პარტიის ლიდერისა და ყოფილი მინისტრის პირადი ცხოვრების ამსახველი მასალა გავრცელდა. მალევე, 14 მარტს მუქარის შემცველი ვიდეოკადრები გავრცელდა. ვიდეომასალა მოქმედი ჟურნალისტებისა და პოლიტიკოსების მიმართ ჩანაწერების გავრცელების მუქარას შეიცავდა, თუ ისინი არ დატოვებდნენ თანამდებობებს.

ამავე თემაზე: