საპარლამენტო უმრავლესობის წევრი, ეკა ბესელია სოციალურ ქსელში პირადი ცხოვრების ამსახველი კადრების გავრცელებას სოციალურ ქსელში ეხმაურება. ბესელიას ინფორმაციით, გუშინ, 27 იანვარს მიაწოდეს ინფორმაცია, რომ სოციალურ ქსელში პირადი და ოჯახური საიდუმლოების უკანონო ჩანაწერი ვრცელდება. მისი თქმით, ეს ჩანაწერი მიხეილ სააკაშვილის მმართველობის დროს დამზადდა და ქართული ოცნების ხელისუფლების დროს გავრცელდა.

"ახლა რა ხდება? ვინ აირჩია ჩემთან ანგარიშსწორება ამ ფორმით? ამ კითხვებზე პასუხი მინდა უმოკლეს ვადაში სამართალდამცავი ორგანოების მხრიდან. ვის ხელში იყო ეს მასალა?" — წერს ბესელია.

ბესელია მთავარ პროკურორს, შალვა თადუმაძეს, შინაგან საქმთა მინისტრს, გიორგი გახარიასა და სახელმწიფო უსაფრთხოების სამსახურის ხელმძღვანელს, ვახტანგ გომელაურს მიმართავს, სასწრაფოდ დადგინეს, ვინ დგას "ამ მორალური ტერორის უკან".

"ვითხოვ ყველა ფაქტზე რეაგირებას, დაწყებული აბაშიძის შეკვეთილი პოსტიდან ბოლო ინფორმაციის ჩათვლით. საჯაროდ გამოავლინეთ. მე მგონი კარგად ესმის ყველას, რას ნიშნავს წითელი ხაზების გადაკვეთა", — წერს ბესელია.

დღეს, 28 იანვარს სოციალურ ქსელებში პოლიტიკოსის პირადი ცხოვრების ამსახველი კადრების გავრცელების შესახებ ინფორმაცია დეპუტატ დავით ჭიჭინაძისგან გახდა ცნობილი. შინაგან საქმეთა სამინისტროს ინფორმაციით, პოლიტიკოსის საჯარო განცხადების საფუძველზე კანონით დადგენილ ფარგლებში სამართლებრივ რეაგირებას მოახდენენ.

ეს პირველი შემთხვევა არაა, როცა ინტერნეტში პოლიტიკოსი ქალების პირადი ცხოვრების ამსახველი კადრების გავრცელებაზეა საუბარი. 2016 წლის 11 მარტში ერთ-ერთი პოლიტიკური პარტიის ლიდერისა და ყოფილი მინისტრის პირადი ცხოვრების ამსახველი მასალა გავრცელდა. მალევე, 14 მარტს მუქარის შემცველი ვიდეოკადრები გავრცელდა. ვიდეომასალა მოქმედი ჟუნრალისტებისა და პოლიტიკოსების მიმართ ჩანაწერების გავრცელების მუქარას შეიცავდა, თუ ისინი არ დატოვებდნენ თანამდებობებს.