"TV Imedi რა დონის დეზინფორმატორია კი ვიცით ყველამ მაგრამ ყველაფრის დაიგნორება არ ღირს ალბათ. ჯერ ჩემს დაზე დაწერეს და ჩემი ფოტო დაურთეს. მერე მიხვდნენ შეცდომას და მეც გამრიეს საქმეში. უმარტივესი გადასამოწმებელია, რომ ამ ბრენდთან არანაირი საერთო არ მაქვს", — ამის შესახებ სოციალურ ქსელში ნათია ბუკია წერს, რომელიც ჯერ ტელეკომპანია იმედმა დააკავშირა ბრენდთან Natia X Lako, რომელიც, მათი თქმით, რუსეთში იყიდება და შემდეგ პარლამენტის ვიცე-სპიკერმა, ნინო წილოსანმა მიუძღვნა მას პოსტი სოციალურ ქსელში.

"უბრალოდ სახელს ვიზიარებ ადამიანთან, რომლის დიზაინითაც ეს საყურე კეთდება. ბევრს ჰქვია ნათია დღეს საქართველოში, ხოდა, ასეთი არაპროფესიონალები რომ ხართ, თქვენს თავებს ეცით პატივი, მარტივია ამ ყველაფრის გადამოწმება. გალერეა მაქვს თანამედროვე ხელოვნების, ყველამ კარგად იცის და რამდენი ქართველი თანამედროვე ხელოვანი გვაქვს ევროპაში და ამერიკაში გამოფენილი და გაყიდული, ეგეც მარტივი სანახავია. რუსეთში გამდიდრებული ოლიგარქები და რუსეთში მოვაჭრე ბიზნესმენები თქვენკენ მოიკითხეთ, მრავლად გყავთ. ნინო წილოსანo, შენც აქვე მოგმართავ, არ მგონია მცდარი ინფორმაციის გავრცელება შეეფერებოდეს თავის აღქმაში პარლამენტის წევრს.

P.S. გაიგეთ, რომ არ ჰყავს ამ აქციებს ლიდერები!", – წერს სოციალურ ქსელში ნათია ბუკია.

პარლამენტის ვიცე-სპიკერი, ნინო წილოსანი სოციალურ ქსელში წერს, რომ "ბუკიების რუსეთში ნაშოვნ ფულზე არაფერი აქვს საწინააღმდეგო. არც იმას მიაქცევდი ყურადღებას, ახლაც რომ რუსეთში იყიდება მათი პროდუქცია, აქ რომ დიდად ევროპულ კამპანიას არ ედგნენ სათავეში და სხვებს არ ამუნათებდნენ — რუსები ხართო, კეთილსინდისიერი კომპანიების წინააღმდეგ ბოიკოტის ტალღას რომ არ აგორებდნენ, თანაც მხოლოდ იმის გამო, რომ ეს კომპანიები მათნაირი ამორალურები არ არიან.

ამ ყველაფერზე რომ არ ვსაუბრობთ, სწორედ ამიტომ გადაწყვიტეს თავხედურად აქეთ მოგვდგნენ.

დასრულდა ამორალურ ხალხთან კოჰაბიტაცია.

პ.ს. ზუსტად ამ ტალახში გასვრილი ხალხი მომდგება მერე, ბაკურიანს რატომ აქებ და ტურისტებს რატომ ეპატიჟებიო. რუსეთებში ივაჭრეთ თქვენ და მე ჩვენს ეროვნულს დავიცავ“, — წერს წილოსანი სოციალურ ქსელში.