ლიზა კუდროუმ, Friends-ის ექვსეულის ერთ-ერთმა ვარსკვლავმა, დრიუ ბერიმორის შოუში სტუმრობისას გაამხილა, რომ მეთიუ პერის გარდაცვალების შემდეგ მის დანატოვარ საჩუქარში პატარა წერილი აღმოაჩინა.

"მეთიუმ ეს საჩუქარი Friends-ის ბოლო სერიის გადაღების შემდეგ მომცა," — ამბობს ლიზა ნამცხვრის შესანახ ქილაზე, რომელიც პერიმ სერიალის გადასაღები მოედნიდან აიღო და კუდროუს აჩუქა — "ახლახანს აღმოვაჩინე, რომ ქილაში მეთიუს ჩემთვის წერილი ჰქონდა დატოვებული. აქამდე არ გამიხსნია და არც შიგნით ჩამიხედავს."

ფოტო: Warner Bros.

ლიზას წერილის შინაარსსა და დეტალებზე არ უსაუბრია, თუმცა სენტიმენტალურად აღნიშნა, რომ "დრო ყველაფერია". მსახიობმა ისიც დაამატა, რომ ნამცხვრის ქილა მისი და მეთიუს პირად ხუმრობას უკავშირდება — ერთ-ერთი სცენის გადაღებისას ლიზამ შეცდომა დაუშვა და საათის ნაცვლად ქილისკენ გაიშვირა ხელი, რაზეც პერისთან ერთად ბევრი იცინა.

ცნობისთვის, მეთიუ პერი 2023 წელს კეტამინის ზედოზირებით გარდაიცვალა ლოს ანჯელესში, საკუთარ სახლში. მისი გარდაცვალების შემდეგ ამერიკის უზენაეს სასამართლოში საქმე აღიძრა და გამოძიების შედეგად დააკავეს 5 ადამიანი, მათ შორის პერის ექიმები, რომლებიც მსახიობს დიდი რაოდენობით ნარკოტიკს აწოდებდნენ.