ეროვნულ-დემოკრატიული ინსტიტუტის კვლევის თანხმად, მოსახლეობის 85%-ს მიაჩნია, რომ პრეზიდენტის არჩევა უნდა მოხდეს პირდაპირი არჩევნების წესით, ხალხის მიერ. გამოკითხულთა მხოლოდ 11% ფიქრობს, რომ პრეზიდენტი უნდა აირჩიოს ხალხის მიერ არჩეულმა წარმომადგენლებმა.

ფოტო: NDI

2018 წელს საქართველოს მოსახლეობამ ბოლოჯერ აირჩია პრეზიდენტი. 2024 წლიდან პრეზიდენტს პირდაპირი წესის ნაცვლად, წარმომადგენლობითი სახით, ხმოსნები აირჩევენ.

ამრჩევი საარჩევნო კოლეგია 300 ხმოსანისგან შედგება, რომლებშიც შევლენ საქართველოს პარლამენტის და აფხაზეთისა და აჭარის ავტონომიური რესპუბლიკების წარმომადგენლობითი ორგანოების ყველა წევრი. გარდა ამისა, სხვა ხმოსნები ადგილობრივი თვითმმართველობის პროპორციული წესით ჩატარებული არჩევნების შედეგების გათვალისწინებით შეირჩევიან.

საქართველოს პრეზიდენტის არჩევნები გაიმართება პარლამენტის შენობაში. არჩევნების პირველ ტურში არჩეულად ჩაითვლება კანდიდატი, რომელიც მიიღებს ყველაზე მეტ ხმას (არანაკლებ 151). თუ პირველ ტურში საქართველოს პრეზიდენტი არ აირჩა, მეორე ტურში კენჭი ეყრება პირველ ტურში საუკეთესო შედეგის მქონე ორ კანდიდატს. მეორე ტურში არჩეულად ჩაითვლება კანდიდატი, რომელიც მეტ ხმას მიიღებს. არჩევნების პირველი ან მეორე ტური შემდგარად ჩაითვლება, თუ მასში მონაწილეობას მიიღებს ხმოსანთა სრული შემადგენლობის ნახევარზე მეტი. თუ ამომრჩეველთა კოლეგიამ საქართველოს პრეზიდენტი ვერ აირჩია, 2 კვირის ვადაში გაიმართება საქართველოს პრეზიდენტის ხელახალი არჩევნები.