თბილისში სახლების გაქურდვისა და გაქურდვის მცდელობის ბრალდებით შინაგან საქმეთა სამინისტრომ ექვსი პირი დააკავა.

უწყების ინფორმაციით, დიდ დიღომში ერთმანეთის მეზობლად მდებარე ორი ბინის გაქურდვის მცდელობის საქემეზე 2 პირი დააკავეს. პოლიციის თქმით, ბრალდებულები დანაშაულის ჩადენის დროს დააკავეს. როგორც განცხადებაში ვკითხულობთ, დაკავებულების პირადი ჩხრეკისას, კარის საკეტების გასაღები კუსტარული ხელსაწყოები ე.წ. ატმიჩკები ნივთმტკიცებად ამოიღეს.

გამოძიება წინასწარი შეთანხმებით ჯგუფის მიერ ბინაში უკანონო შეღწევით ჩადენილ ქურდობის მცდელობის ფაქტებზე, საქართველოს სისხლის სამართლის კოდექსის 177-ე მუხლის მე-3 ნაწილის "ა" და "გ" ქვეპუნქტებით მიმდინარეობს. დანაშაული 4-დან 7 წლამდე ვადით თავისუფლების აღკვეთას ითვალისწინებს.

შინაგან საქმეთა სამინისტროს განცხადებითვე, ბოლო პერიოდში თბილისში, კერძოდ, ნუცუბიძის პლატოსა და ვარკეთილში ბინები, დიღმის სანერგე მეურნეობაში კი საცხოვრებელი სახლის გაქურდვის საქმეები გახსნეს.