ცოტახნის წინ ქეით ბლანშეტი ოქსფორდის უნივერსიტეტის ახალ მიწვეულ პროფესორად დასახელდა. მსახიობი 2026-2027 სასწავლო წლის განმავლობაში წმინდა ეკატერინეს კოლეჯში თანამედროვე თეატრის შესახებ კურსს გაუძღვება. მიწვეული პროფესორის პოზიცია 1990 წელს შეიქმნა და წარსულში მას ისეთი ცნობილი ადამიანები იკავებდნენ, როგორებიც არიან იან მაკკელენი, მირა სიალი და დიანა რიგი.

"მიწვეული პროფესორის სტატუსი ჩემთვის აღმაფრთოვანებელი შანსია და შესაძლებლობას მაძლევს, მქონდეს პირდაპირი და აქტიური შემოქმედებითი დიალოგი მოაზროვნეთა და შემოქმედთა მომავალ თაობასთან", — განაცხადა ბლანშეტმა.

შეგახსენებთ, რომ ბლანშეტს ორი ოსკარი აქვს მოპოვებული. პირველი ოსკარი ფილმში The Aviator კეტრინ ჰეპბერნის განსახიერებისთვის მიიღო, მეორე კი ვუდი ალენის ფილმში Blue Jasmine შესრულებული როლისთვის.

ფოტო: Getty

ქეით ბლანშეტმა პოპულარულობა მას შემდეგ მოიპოვა, რაც 1998 წელს ელიზაბეთ I განასახიერა ფილმში Elizabeth. მოგვიანებით კი, მსახიობმა ითამაშა ისეთ ცნობილ ფილმებში, როგორებიცაა The Lord of the Rings, Ocean’s 8, Carol, Notes on a Scandal და Tár.

"ხელოვნება ჩვენი წარმოსახვის საზღვრებსა და ჩარჩოებს ანგრევს. ის ასევე ბადებს კითხვებს, ხოლო მასთან შემოქმედებითი თამაში და მისი სიღრმისეული ანალიზი ჩვენს ამჟამინდელ რეალობას აფართოებს და ახალი გამოწვევების წინაშე აყენებს. მრავალწლიანმა შემოქმედებითმა პრაქტიკამ საშუალება მომცა, გრძნობები მკაფიო იდეებად მექცია და ახალი ხედვებისკენ მიმავალი გზები მეპოვა", — განაცხადა ბლანშეტმა.

მსახიობის მრავალფეროვან კარიერას ამჯერად მიწვეული პროფესორის სტატუსიც დაემატა. აკადემიური წლის განმავლობაში ბლანშეტი წაიკითხავს ლექციებს და აქტიური კომუნიკაცია ექნება როგორც სტუდენტებთან, ისე უნივერსიტეტის ფართო საზოგადოებასთან.