პოლონეთის პრემიერმინისტრი დონალდ ტუსკი X-ზე წერს, რომ ოპოზიციონერი რუსი მხატვრისა და სატირიკოსის, სემიონ სკრეპეცკის მკვლელობაში ეჭვმიტანილი პირი დააკავეს და ის საქართველოს პასპორტით სარგებლობდა.

"ლუბლინის პოლიციამ და პოლონეთის შიდა უსაფრთხოების სააგენტომ რუსეთის მოქალაქის მკვლელობაში ეჭვმიტანილი დააკავა! ის საქართველოს პასპორტით სარგებლობდა. სამართალდამცავი უწყებები დანაშაულის დამკვეთის დადგენაზე მუშაობენ," — წერს ტუსკი.

პოლონეთის ქალაქ ბიალა პოდლასკაში ოპოზიციონერი რუსი მხატვარი და სატირიკოსი სემიონ სკრეპეცკი (ნამდვილი სახელი — რობერტ კუზოვკოვი) ცეცხლსასროლი იარაღით მოკლეს. პოლიციის ცნობით, 44 წლის რუსეთის მოქალაქეს საცხოვრებელი კორპუსის მიმდებარე ავტოსადგომზე ესროლეს.

ტელეარხ wPolsce24-ის ინფორმაციით, თავდამსხმელმა მხატვარს ახლო დისტანციიდან რამდენჯერმე ესროლა. ადგილზე მისულმა სასწრაფო დახმარების ექიმებმა მისი გადარჩენა ვერ შეძლეს. მკვლელობის შემდეგ, პოლიციამ ქალაქიდან გასასვლელი გზები გადაკეტა, ხოლო სკოლები და საბავშვო ბაღები, სადაც შესაძლოა მისი შვილები ყოფილიყვნენ, დამატებითი დაცვის ქვეშ მოაქცია.

სემიონ სკრეპეცკი ალთაის რეგიონში იყო დაბადებული და ცნობილი გახდა პოლიტიკოსების სატირული კარიკატურებით. მის ნამუშევრებში ხშირად ფიგურირებდნენ რუსეთის პრეზიდენტი ვლადიმირ პუტინი, ბელარუსის ლიდერი ალექსანდრ ლუკაშენკო, ჩეჩნეთის ლიდერი რამზან კადიროვი და გარდაცვლილი რუსი ოპოზიციონერი ალექსეი ნავალნი.