ჟურნალისტური ეთიკის ქარტიის შეფასებით, პროკურატურის გადაწყვეტილებას ტელეკომპანია "ფორმულას" წინააღმდეგ სისხლის სამართლის საქმის აღძვრა საგანგაშოა. ქარტია პროკურატურის ამ გადაწყვეტილებას მედიის დაშინების რიგით მცდელობად აფასებს.

განცხადებაში ვკითხულობთ, რომ "კრიტიკული მედიის მიმართ რეპრესიული მიდგომები საქართველოში მუდმივად ახალ სახეს იძენს და სულ უფრო ღრმავდება".

"ქარტია პროკურატურის მიერ გამოძიების დაწყებას მედიის დაშინების მცდელობად აფასებს.

ჟურნალისტური ეთიკის ქარტია საგანგაშოდ მიიჩნევს საქართველოს პროკურატურის გადაწყვეტილებას ტელეკომპანია "ფორმულას" წინააღმდეგ სისხლის სამართლის საქმის აღძვრის შესახებ. საქმე ეხება გოგა ხაინდრავას მიმართ დანაშაულის ჩადენის შესაძლო ფაქტს. პროკურატურის განცხადებით, გამოძიება დაიწყო სისხლის სამართლის კოდექსის 373-ე მუხლის პირველი ნაწილით, რაც ცრუ დასმენას გულისხმობს. გოგა ხაინდრავა მოწმის სახით უკვე გამოიკითხა.

გავრცელებული ინფორმაციით, პროკურატურა ცრუ დასმენას"ფორმულას" წყაროს ედავება.

სავარაუდოდ, საქმე ეხება "შაბათის ფორმულას" ეთერში 2025 წლის 20 დეკემბერსა და 2026 წლის 17 იანვარს გასულ სიუჟეტებს, რომელთა გამოც "ფორმულას" გოგა ხაინდრავა სასამართლოში ცილისწამებისთვის უჩივის.

ქარტია პროკურატურის ამ ქმედებას განიხილავს, როგორც ინსტრუმენტს მედიის დასაშინებლად და გამომძიებელი ჟურნალისტების დასასჯელად. წყაროს კონფიდენციალობა ჟურნალისტის დაცული უფლება და ფუნდამენტური პროფესიული სტანდარტია. დაუშვებელია ჟურნალისტის იძულება, წყარო გაამჟღავნოს.

კრიტიკული მედიის მიმართ რეპრესიული მიდგომები საქართველოში მუდმივად ახალ სახეს იძენს და სულ უფრო ღრმავდება. უკიდურესად მტრული და ხელშემშლელი გარემო არის ის ყოველდღიურობა, რა პირობებშიც დამოუკიდებელ მედიას უწევს მუშაობა.

ქარტია სოლიდარობას უცხადებს ტელეკომპანია "ფორმულას" და მის გუნდს, რომელიც ქვეყანაში შექმნილი ვითარების ფონზე პროფესიული საქმიანობის ერთგული რჩება," — წერს ჟურნალისტური ეთიკის ქარტია.

გოგა ხაინდარავამ ტელეკომპანია "ფორმულას" 17 იანვარს გასული სიუჟეტისთვის უჩივლა. ფორმულას სიუჟეტში საუბარი იყო იმაზე, რომ 2016-2017 წლებში გოგა ხაინდრავას, სუს-თან შეთანხმებით, ინდოეთისა და პაკისტანის მოქალაქეები საქართველოში გარკვეული თანხის სანაცვლოდ შემოჰყავდა.