ჟურნალისტი ნანუკა ჟორჟოლიანი ერთიანი ნაციონალური მოძრაობის თავმჯდომარის, თინა ბოკუჩავასა და საქართველოს მესამე პრეზიდენტის განცხადებებს გამოეხმაურა, რომელიც ჟორჟოლიანის ენმ-ის თავმჯდომარეობის კანდიდატად დასახელებას ეხება.

ნანუკა ჟორჟოლიანმა განმარტა, რომ მისთვისაც და მიხეილ სააკაშვილისთვისაც იდეალური იქნებოდა მისი ბოკუჩავას თავმჯდომარეობისას ნაციონალურ მოძრაობაში ინტეგრაცია. ჟორჟოლიანის თქმით, "ხაბე რომ გარეთ ყოფილიყო, მისი საჭიროება არც კი იარსებებდა ნაციონალურ მოძრაობაში".

ჟორჟოლიანი წერს, რომ მას შეუძლია პარტიას "მიშას ტემპი" დაუბრუნოს, "როცა მთავარი სახალხოობა იყო, პოლიტიკა — საყველპურო."

"მიშასთვისაც და ჩემთვის იდეალური იქნებოდა თინას თავმჯდომარეობით ნაცმოში ჩემი ინტეგრაცია.

როგორც უკვე ვთქვი, ჩემზე ჭკვიანია, ჩემზე გამოცდილი, მან იცის ის, რაც მე არ ვიცი და მე შემიძლია, რისი უნარებიც შეიძლება მას არ ჰქონდეს. იდეალური პარტნიორები ვიქნებოდით და სამწუხაროა, რომ ასე არ დალაგდა.

ამ პარტიას ჰყავს მთავარი ლიდერი და ის მიხეილ სააკაშვილია, ჰყავს ხაბე, რომელმაც ბევრი იშრომა გუნდისთვის და საერთო საქმისთვის.

ხაბე რომ გარეთ ყოფილიყო, ჩემი საჭიროება არც კი იარსებებდა ნაციონალურ მოძრაობაში. ტყვეობაშია ირაკლი ნადირაძე, რომელმაც წაგებულ ომში შესვლით, მონობას თავგანწირვა ამჯობინა.

მე რა შემიძლია გავაკეთო?! პარტიას დავუბრუნო მიშას ტემპი, პრიორიტეტები, როცა მთავარი სახალხოობა იყო, პოლიტიკა — საყველპურო. მე ამ პარტიაში ჩემს თავს მენეჯერად განვიხილავ. იქნებ თავმჯდომარე ასეთიც შეიძლება იყოს. იქნებ პოლიტიკას ჰალსტუხის ბოლომდე მოჭერა აღარ სჭირდება.

თუ პარტია ახლა კრიზისშია, იქნებ კრიზისმენეჯერი სჭირდება?

საგარეო ველი უმნიშვნელოვანესია, რასაც კომპეტენცია და სწორი მიდგომები სჭირდება, ცოდნა და გამოცდილება. შესაბამისად, ადამიანი, რომელიც ამ თემას ჩაიბარებს იქნება მცოდნე და კომპეტენტური. ექნება სრული ნდობა და დამოუკიდებლობა. ის ქვეყნის გარეთ და მე ქვეყნის შიგნით.

ახლა კი მთავარი. ეს პარტია უნდა გადაიბარონ ახალგაზრდებმა. ვეტერანები ზურგს გაუმაგრებენ. პარტია დიდი მოლოდინით ხვდება სიახლეებს და მადლობა მათ სწორი და საქმიანი დამოკიდებულებებისთვის, რაც ამ დღეებში დავინახე.

ამ საუკუნეში რაც უფრო შეშლილია იდეა, უფრო ეფექტურად მუშაობს, ჰოდა იქნებ აქაც იმუშაოს", — დაწერა ჟორჟოლიანმა.

შეგახსენებთ, მანამდე საქართველოს მესამე პრეზიდენტმა, მიხეილ სააკაშვილმა ციხიდან განცხადება გამოაქვეყნა, სადაც დაწერა, რომ ნაციონალური მოძრაობის ახალი თავმჯდომარეობის კანდიდატი ჟუნალისტი ნანუკა ჟორჟოლიანი უნდა იყოს. სააკაშვილმა ასევე აღნიშნა, რომ ჟორჟოლიანს მისი სრული ნდობა აქვს.

მოგვიანებით, მესამე პრეზიდენტის ამ განცხადებას პარტია ერთიანი ნაციონალური მოძრაობის თავმჯდომარე თინა ბოკუჩავა გამოეხმაურა. მან აღნიშნა, რომ ეს პოსტი მისთვის მოულოდნელი იყო და სწორე ამგვარმა იმპულსურმა და არათანმიმდევრულმა გადაწყვეტილებებმა მიიყვანა პარტია იქ, სადაც არის.

"პრეზიდენტ სააკაშვილის პოსტი სულ რამდენიმე წუთის წინ, ბრიფინგზე გზად წავიკითხე. ეს პოსტი მოულოდნელი იყო და ჩემთვის უკიდურესად სამწუხაროა და მიმაჩნია, რომ სწორედ ამგვარმა იმპულსურმა და არათანმიმდევრულმა გადაწყვეტილებებმა მიგვიყვანა იქ სადაც ვართ. მაგრამ, ეს იმას არ ნიშნავს ჩვენ ერთი წუთით გავჩერდებით," — განაცხადა თინა ბოკუჩავამ.