კრემლთან დაკავშირებული კერძო სამხედრო დაჯგუფება ჩვკ ვაგნერის სამხედროები, ვენესუელაში ნიკოლას მადუროს დასაცავად გაგზავნეს. ინფორმაციას ამის შესახებ Reuters ავრცელებს. გამოცემის ინფორმაციით, ბოლო დღეებში გააგზავნეს იმ კერძო კომპანიების სამხედროები, რომლებიც რუსეთის საიდუმლო დავალებებს ასრულებენ.

არსებული ინფორმაციით, დაქირავებული რუსი მებრძოლები ვენესეულაში კუბის გავლით ჩავიდნენ. ორი ჩარტერული რეისით ისინი ჰავანამდე ჩაფრიდნენ, ჰავანადან კარაკასამდე კი კომერციული რეისით გადავიდნენ.

ჩვკ ვაგნერი რუსეთში მოქმედი კერძო სამხედრო კომპანიაა, რომელიც ძირითადად რუსეთის არმიის ვეტერანებისგან შედგება. ვაგნერის მეომრებიუკრაინასა და სირიაში მიმდინარე კონფლიქტებში აქტიურად მონაწილეობდნენ. სირიაში ამერიკელ სამხედროებთან შეტაკებას ვაგნერის 200-ზე მეტი დაქირავებული მებრძოლი ემსხვერპლა.

საძიებო სერვერების მონაცემებით, ბოლო კვირის განმავლობაში ვენესუელაში რუსეთის სახელმწიფო დაქვემდებარებაში მყოფი ილ-96 ჩაფრინდა. არსებული ინფორმაციით თვითმფირანავები, რომლითაც მებრძოლეები გაფრინდნენ, რუსეთის პრეზიდენტის ადმინისტრაციის დაქვემდებარებაშია. ჯერჯერობით უცნობია თუ რა რაოდენობის კონტინგენტზეა საუბარი. გამოცემის წყაროს თქმით, მებრძოლების რაოდენობა 400-ს არ აღემატება, თუმცა შესაძლებელია უფრო ნაკლებიც იყოს.

ვენესუელას და რუსეთის თავდაცვის სამინისტროები ამ საკითხზე არაფერს ამბობენ. რუსეთის პრეზიდენტის პრესსპიკერის, დიმიტრი პესკოვის თქმით, აღნიშნულთან დაკავშირებით არაფერი იციან.

ვენესუელის კრიზისი

ბოლო რამდენიმე დღის განმავლობაში, ვენესუელა ფართო საზოგადოებრივმა პროტესტმა მოიცვა. მოსახლეობა ქვეყნის ამჟამინდელი პრეზიდენტის ნიკოლას მადუროს გადადგომას მოითხოვს.

23 იანვარს ვენესუელის ეროვნული ასამბლეის თავმჯდომარემ, ხუან გუაიდომ თავი პრეზიდენტის მოვალეობის დროებით შემსრულებლად გამოაცხადა. ოპოზიციის ლიდერი დაპირდა ხალხს, რომ დაასრულებს ძალაუფლების უზურპაციას, ჩამოაყალიბებს გარდამავალ მთავრობას და ჩაატარებს სამართლიან არჩევნებს.

პროტესტების ახალი ტალღა ქვეყანაში მას შემდეგ დაიწყო, რაც თავდაცვის სამინისტრომ შეუმდგარი სამხედრო გადატრიალების შესახებ გაავრცელა ინფორმაცია. მოძრაობას სათავეში, სწორედ ხუან გუაიდო ჩაუდგა, რომელიც აქტიურად მოუწოდებდა მის მხარდამჭერებს ებრძოლათ ნიკოლას მადუროს წინააღმდეგ.

ქვეყნის გარდამავალ პრეზიდენტად ხუან გუაიდო პირველად აშშ-ს პრეზიდენტმა, დონალდ ტრამპმა აღიარა. სპეციალურ განცხადებაში ტრამპმა აღნიშნა, რომ ქვეყნის ლეგიტიმური მმართველი ახლა გუაიდოა და არა ნიკოლას მადურო.

სპეციალური ვიდეო მიმართვა გაავრცელა აშშ-ს ვიცე პრეზიდენტმა მაიკ პენსმაც. პენსმა ნიკოლას მადურო დიქტატორად მოიხსენია და ვენესუელის მოსახლეობას სრული მხარდაჭერა აღუთქვა.

შტატების შემდეგ მსგავსი განცხადება გაავრცელეს კანადამ, კოლუმბიამ, პერუმ, ბრაზილიამ, არგენტინამ, ჩილემ, პარაგვაიმ, ბოლივიამ, ეკვადრომა, პანამამ, გვატემალამ, ჰონდურასმა, კოსტა-რიკამ და საქართველომ.

მადუროს მხარდაჭერა თურქეთმა, რუსეთმა, კუბამ, ბოლივიამ და ჩინეთმა გამოუცხადეს. მექსიკამ კი მოუწოდა ვენესუელელებს ქვეყნის ხელისუფლება კანონიერი გზით აირჩიონ.

ამავე თემაზე: