ადამიანის უფლებების სწავლებისა და მონიტორინგის ცენტრს მიაჩნია, რომ მოსამართლეთა ის სია, რომელმაც კონკურსში მონაწილეობაზე უარი თქვეს, ისედაც გადაწყვეტილი იყო, რომ ამ სახით არ წარდგებოდა პარლამენტში. ამის შესახებ ორგანიზაციის წარმომადგენელი, სოფო ვერძეული On.ge-ს ესაუბრა.

"ახლა მათი გადაწყვეტილება არის მცდელობა, რომ ისედაც გადაწყვეტილ ამბავზე საზოგადოების თვალში მორალური უპირატესობა მოიპოვონ. ასე ავხსნიდი ამ გადაწყვეტილებას", — ამბობს ვერძეული.

მისი თქმით, მოსამართლეობის ამ კანდიდატებს, რომ დისკომფორტი ჰქონოდათ იმ პროცესთან დაკავშირებით, რომლის მონაწილეებიც იყვნენ, მანამდე გაავრცელებდნენ ინდივიდუალურად განცხადებას.

"საერთო განცხადება კიდევ ერთხელ მიანიშნებს, რომ ცალკეულ კანდიდატებს არ მიუღიათ ამაზე გადაწყვეტილება და ეს არის შეთანხმებული ნაბიჯი, სულ ცოტა ერთმანეთთან იმისთვის, რომ მორალური უპირატესობა სასამართლომ და ამ ჯგუფმა ამ პროცესში მოიპოვოს", — განმარტავს ვერძეული.

მისი თქმით, პროცესი ჯერ არ დამთავრებულა და შესაძლოა, ამ კანდიდატებს მაინც გაუჩნდეთ უზენაეს სასამართლოში უვადოდ გამწესების სურვილი, როცა საბჭო ახლიდან დაასახელებს სიას.

დღეს, 21 ნოემბერს უზენაესი სასამართლოს მოსამართლეობის ათივე კანდიდატმა პარლამენტს მოუწოდა, მათი კანდიდატურები არ განიხილონ. საერთო განცხადებაში მოსამართლეობის კანდიდატები არაჯანსაღს უწოდებენ იმ კრიტიკას, რომელიც მათ წინააღმდეგ გამოითქმებოდა, მათ შორის პარლამენტში.

დაპირისპირება მოსამართლეების გარშემო

უზენაესი სასამართლოს უვადო მოსამართლეების კანდიდატთა სია იუსტიციის უმაღლესმა საბჭომ 2018 წლის დეკემბრის ბოლოს წარადგინა. სიას მხარს არ უჭერდნენ საბჭოს არამოსამართლე წევრები ნაზი ჯანეზაშვილი და ანა დოლიძე. ისინი და სამოქალაქო სექტორი მოსამართლეობის ზოგიერთ კანდიდატს ე.წ. ჩინჩალაძე-მურუსიძის კლანის წევრებად მოიხსენიებდნენ.

საბჭოს მიერ წარდგენილი მოსამართლეების სია და ეკა ბესელიას მიერ იურიდიულ საკითხთა კომიტეტის დატოვება დაპირისპირების მიზეზი გახდა მმართველ პარტიაში. წასვლის მიზეზებზე საუბრისას ბესელიამ განაცხადა, რომ საქართველოს პარლამენტის თავმჯდომარემ, ირაკლი კობახიძემ მას მოსთხოვა, კომიტეტს მოსამართლეების სია პარლამენტში დარეგისტრირებიდან მეოთხე დღეს განეხილა და მისთვის მხარი დაეჭირა. დეპუტატის თქმით, სწორედ ამ მიზეზით დატოვა იურიდიულ საკითხთა კომიტეტის თავმჯდომარის პოსტი და ამით უზენაესი სასამართლოს მოსამართლეების სიის დამტკიცებას შეუშალა ხელი.

ბესელიამ აღნიშნა, რომ იუსტიციის უმაღლესი საბჭოს მიერ წარდგენილ სიაში მყოფი მოსამართლეები ნაციონალური მოძრაობის "დანაშაულებრივ რეჟიმს" უკავშირდებოდნენ და მათი არჩევა სასამართლო სისტემისა და ქართული ოცნების ღირებულებების ნგრევისკენ გადადგმული ნაბიჯი იქნებოდა.

ამავე თემაზე: