საერთაშორისო გამჭვირვალობა — საქართველოს ხელმძღვანელი ეკა გიგაური ამბობს, რომ მოსამართლეების მიერ უზენაეს სასამართლოს კონკურსში მონაწილეობაზე უარის თქმა საზოგადოებრივი პროტესტის შედეგია. თუმცა ის აღნიშნავს, რომ მთავარი მოთხოვნაა სისტემიდან წავიდეს "კლანი", რომელმაც ეს სია შექმნა.

"საზოგადოების პროტესტი, ასევე, უკავშირდება კონკრეტულ მოსამართლეებს და პროტესტი უნდა გაგრძელდეს. მთავარი მოთხოვნა უნდა შესრულდეს იქამდე, სანამ ჩვენ კრიტერიუმებსა და ახალ სიაზე ვისაუბრებთ", — აღნიშნა ეკა გიგაურმა On.ge-სთან საუბრისას.

გიგაურის ფიქრობს, კრიტერიუმების შედგენის შემდეგ, შესაძლოა, იუსტიციის საბჭოს ახალ სიაში იგივე ადამიანები ან მათდამი ლოიალურად განწყობილი ადამიანები ვიხილოთ:

"პირველ და მეორე ინსტანციაში მოსამართლეების არჩევს გარკვეული კრიტერიუმი გვაქვს, მაგრამ მიუხედავად ამისა უვადოდ დაინიშნა ჩინჩალაძე და მურუსიძე. ეს კრიტერიუმები საბჭოს წევრების შეფასებით მათ დააკმაყოფილეს. წარმოიდგინეთ, ახალი კრიტერიუმები რომ იქნება, ასევე, დააკმაყოფილებენ ეს ადამიანები. გადაწყვეტილებას მიიღებენ ამ კლანის წევრები".

გიგაური ფიქრობს, რომ სახელმწიფომ და ქართულმა ოცნებამ პოლიტიკური ნება უნდა გამოიჩინო და სასამართლოს შიგნით შეწყვიტონ ე.წ. ჩინჩალაძე-მურუსიძიე კლანის მხარდაჭერა.

დღეს, 21 ნოემბერს უზენაესი სასამართლოს მოსამართლეობის ათივე კანდიდატმა პარლამენტს მოუწოდა, მათი კანდიდატურები არ განიხილონ. საერთო განცხადებაში მოსამართლეობის კანდიდატები არაჯანსაღს უწოდებენ იმ კრიტიკას, რომელიც მათ წინააღმდეგ გამოითქმებოდა, მათ შორის პარლამენტში.

დაპირისპირება მოსამართლეების გარშემო

უზენაესი სასამართლოს უვადო მოსამართლეების კანდიდატთა სია იუსტიციის უმაღლესმა საბჭომ 2018 წლის დეკემბრის ბოლოს წარადგინა. სიას მხარს არ უჭერდნენ საბჭოს არამოსამართლე წევრები ნაზი ჯანეზაშვილი და ანა დოლიძე. ისინი და სამოქალაქო სექტორი მოსამართლეობის ზოგიერთ კანდიდატს ე.წ. ჩინჩალაძე-მურუსიძის კლანის წევრებად მოიხსენიებდნენ.

საბჭოს მიერ წარდგენილი მოსამართლეების სია და ეკა ბესელიას მიერ იურიდიულ საკითხთა კომიტეტის დატოვება დაპირისპირების მიზეზი გახდა მმართველ პარტიაში. წასვლის მიზეზებზე საუბრისას ბესელიამ განაცხადა, რომ საქართველოს პარლამენტის თავმჯდომარემ, ირაკლი კობახიძემ მას მოსთხოვა, კომიტეტს მოსამართლეების სია პარლამენტში დარეგისტრირებიდან მეოთხე დღეს განეხილა და მისთვის მხარი დაეჭირა. დეპუტატის თქმით, სწორედ ამ მიზეზით დატოვა იურიდიულ საკითხთა კომიტეტის თავმჯდომარის პოსტი და ამით უზენაესი სასამართლოს მოსამართლეების სიის დამტკიცებას შეუშალა ხელი.

ბესელიამ აღნიშნა, რომ იუსტიციის უმაღლესი საბჭოს მიერ წარდგენილ სიაში მყოფი მოსამართლეები ნაციონალური მოძრაობის "დანაშაულებრივ რეჟიმს" უკავშირდებოდნენ და მათი არჩევა სასამართლო სისტემისა და ქართული ოცნების ღირებულებების ნგრევისკენ გადადგმული ნაბიჯი იქნებოდა.

ამავე თემაზე: