უზენაესი სასამართლოს მოსამართლეობის 10-ვე კანდიდატი პარლამენტს მოუწოდებს, მათი კანდიდატურები არ განიხილოს. საუბარია იმ მოსამართლეებზე, რომლებსაც არასამთავრობო სექტორი და მოქალაქეების ნაწილი "ჩინჩალაძე-მურუსიძის კლანის" მოიხსენიბედნენ. განცხადებას, რომელსაც მოსამართლეობის 10-ვე კანდიდატი აწერს ხელს, წინ უსწრებდა დღეს, 21 იანვარს გამართული აქცია.

მოსამართლეობის კანდიდატები არაჯანსაღს უწოდებენ იმ კრიტიკას, რომელიც მათ წინაამღდეგ გამოითქმებოდა, მათ შორის პარლამენტში.

"სამწუხაროდ, ამავე დროს, ხშირ შემთხვევაში ადგილი ჰქონდა წარდგენილი კანდიდატების მიმართ არაეთიკურ და შეურაცხმყოფელ გამონათქვამებს, რაც მოგვიანებით ხელოვნურად გადაიზარდა სასამართლო ხელისუფლებაზე უპრეცედენტო ზეწოლის კამპანიაში, სადაც უკვე პირდაპირ გაისმის მოწოდებები რეპრესიული გზით დაიშალოს იუსტიციის უმაღლესი საბჭო და სასამართლო სისტემიდან განდევნილ იქნენ მიუღებელი, მათ შორის, ამ სიაში მყოფი მოსამართლეები. ყოველივე ეს კი პირდაპირ ზიანს აყენებს სასამართლო დამოუკიდებლობას და უხეშად ხელყოფს სამართლებრივი სახელმწიფოს პრინციპს", — ნათქვამია განცხადებაში.

უვადო მოსამართლეობის კანდიდატები აღნიშნავენ, რომ მათ არ სურთ გარკვეულ პირებს ეს ვითარება გამოეყენებინათ თავიანთი პოლიტიკური მიზნებისთვის. მოსამართლეობის კანდიდატები განცხადებაში აღნიშნავენ, რომ პარლამენტმა კანდიდატურები არ უნდა განიხილოს "არაჯანსაღი სპეკულაციების თავიდან აცილების მიზნით".

განცხადებას ხელს აწერენ: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.