საქართველოს პრემიერ-მინისტრმა, მამუკა ბახტაძემ პოლიტიკური შეფასება უწოდა ჟურნალისტის იმ კითხვას, რომელიც კახა კალაძის მიერ ოპოზიციისთვის მიმართვის შეფასებას შეეხებოდა. თბილისის მერის იმ ნათქვამზე, რომლითაც ის ოპოზიციის სხვადასხვა წევრებს "მთაწმინდიდან გამოქანებისკენ" მოუწოდებდა.

"კახას სიტყვებია არაეთიკური? ამის თქმა გსურთ? რომ კახას სიტყვებია არაეთიკური?" — თქვა პრემიერმა ბრიფინგზე.

ლევან ხაბეიშვილმა დღეს, 18 იანვარს განაცხადა, რომ ქალაქის მერის პოზიცია დიდ დიღომში მომხდარ აფეთქებასთან დაკავშირებით ჰგავდა დამნაშავე ბიზნესმენის პოზიციას, რომელიც თავის გამართლებაც ცდილობს. მისი თქმით, კალაძე კომპანია ყაზტრანსგაზის "არაფორმალური მენეჯერია" და მისი ბრალეულობის გამოსაკვეთად საგამოძიებო უწყებებმა ის უნდა დაკითხონ.

"მთაწმინდაზე გამოსაქანებელ ადგილს ვაფართოებთ", — ასე უპასუხა ქალაქის მერმა ხაბეიშვილის ბრალდებებს. კალაძემ აღნიშნა, რომ ექსპრეზიდენტ მიხეილ სააკაშვილს "მთაწმინდიდან გამოქანება" არ გამოუვა, რადგან ქვეყანაში არ იმყოფება, ამიტომ დაამატა: "მას შეუძლია ჰოლანდიიდან გამოექანოს. როგორიც არის გამონათქვამები, ისეთი არის პასუხები".