არასამთავრობო ორგანიზაციები სახალხო დამცველის ოფისთან გამართულ მმკ-ის საპროტესტო აქციას განცხადებით გამოეხმაურნენ:

"მიგვაჩნია, რომ ექსტრემისტული რელიგიული ჯგუფების მხრიდან საგანმანათლებლო და საჯარო სივრცეების კონტროლის მცდელობები, რომელსაც, სამწუხაროდ, სახელმწიფო ეფექტიან და გაბედულ პოლიტიკას ვერ უპირისპირებს, სერიოზულ ზიანს აყენებს საქართველოში დემოკრატიული, პლულარული და სოლიდარული საზოგადოების განვითარების პროცესს".

ხელმომწერი ორგანიზაციები, მათ შორის ადამიანის უფლებების სწავლებისა და მონიტორინგის ცენტრი-EMC, ქალთა ინიციატივების მხარდამჭერი ჯგუფი (WISG) და ტოლერანტობისა და მრავალფეროვნების ინსტიტუტი (TDI) აცხადებენ, რომ წინასაარჩევნო პერიოდში ექსტრემისტული ჯგუფების გაძლიერების ტენდენციის გათვალისწინებით, მნიშვნელოვანია ხელისუფლებამ ჯეროვნად უპასუხოს მათ შესაძლო ძალადობრივ ინციდენტებს, მათ შორის, ადამიანის უფლებებზე მომუშავე ინსტიტუტებისა და ორგანიზაციების მიმართ თავდასხმის ფაქტებს და უზრუნველყოს ადამიანის უფლებების განუხრელი დაცვა და პატივისცემა:

"არსებითია განათლებისა და მეცნიერების სამინისტრომ სეკულარული, აკადემიურ სწავლებაზე და სამოქალაქო ცნობიერების განვითარებაზე ორიენტირებული საგანმანათლებლო პოლიტიკის გატარება უზრუნველყოს და ამ პროცესში, სრულად გაითვალისწინოს წლების განმავლობაში სახალხო დამცველის ანგარიშებში წარმოდგენილი რეკომენდაციები".

ორიგანიზაციის მიერ გავრცელებულ წერილში ასევე ნათქვამია, რომ ხელმომწერი ორგანიზაციები მხარს უჭერენ სახალხო დამცველის და მას საჯარო სკოლებში არსებულ სისტემურ პრობლემებზე აქტიური მუშაობის გაგრძელებისკენ მოუწოდებენ.

21 აპრილს სახალხო დამცველი, უჩა ნანუაშვილი, მისი ანგარიშის მიმართ პროტესტს გამოეხმაურა. ომბუდსმენის განცხადებაში წერია, რომ გავრცელებული ინფორმაცია თითქოს სახალხო დამცველი ბავშვების ექსკურსიაზე ტაძრებში წაყვანის აკრძალვას ითხოვს, არ შეესაბამება სინამდვილეს:

"საგაკვეთილო პროცესის ლოცვით დაწყება, არააკადემიური მიზნებით სალოცავი კუთხეების მოწყობა, სასულიერო პირების სკოლებში მოწვევა და მათ მიერ სკოლის, საკლასო ოთახების კურთხევა, მოსწავლეების რელიგიურ რიტუალებში ჩაბმა, მასწავლებლების მხრიდან განსხვავებული რელიგიური აღმსარებლობის მქონე მოსწავლეებთან არათანაბარ დამოკიდებულება და სხვა წინააღმდეგობაში მოდის ზოგადი განათლების შესახებ საქართველოს კანონის პრინციპებთან".

19 აპრილს, სასულიერო პირების ნაწილმა სახალხო დამცველის ოფისთან, საჯარო სკოლებში დისკრიმინაციული გარემოს შესახებ სახალხო დამცველის საპარლამენტო ანგარიშში წარმოდგენილი კრიტიკული შეფასებები გააპროტესტეს.