14 აპრილს, იურიდიულ საკითხთა კომიტეტმა ქართული ოცნების მიერ დაინიცირებულ 2 კანონპროექტს დაუჭირა მხარი:

  • "გრანტების შესახებ" კანონში დაგეგმილი ცვლილებებს — I მოსმენით;
  • ნარკოპოლიტიკის კანონპროექტს — III მოსმენით.

"გრანტების შესახებ" კანონში ცვლილება

ოცნების პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ სხდომაზე განაცხადა, რომ თუკი გრანტის მიღებაზე მთავრობის თანხმობის გაცემის შემდეგ შეიცვლება გრანტის მიზანი ან თუკი მიმღები უმიზნოდ დახარჯავს აღნიშნულ თანხას, ამ შემთხვევაში თანხმობის გარეშე გაცემულ გრანტად ჩაითვლება და დადგება პასუხისმგებლობის საკითხი.

ამასთან ერთად, მთავრობას ექნება არა მარტო გრანტის ხელშეკრულებაზე, არამედ ნებისმიერ დოკუმენტზე წვდომის უფლება, რომელიც საჭირო იქნება "ამ საკითხის განხილვის ფარგლებში" და ანტიკორუფციულ ბიუროს შეეძლება ინდივიდის "მიღებული სახსრების" შემოწმება და თუკი "ეს აღმოჩნდება გრანტი", დაიწყება "ის პროცედურა, რომელიც კანონპროექტითაა შემოთავაზებული".

"გთავაზობთ, რომ დაკონკრეტდეს, რომ მთავრობას ექნება დამატებითი უფლებამოსილება, რომ არა მხოლოდ ხელშეკრულება და ხელშეკრულებაში გაწერილი საკითხები შეისწავლოს, არამედ შესაძლებელია, რომ ამ საკითხის განხილვის ფარგლებში სხვა დამატებითი დოკუმენტები, სხვა დამატებითი ინფორმაციის მოთხოვნაც იყოს რელევანტური, რათა თანხმობა იყოს გაწერილი. ამისათვის, გთავაზობთ, რომ კანონპროექტში ჩაეწეროს — გადაწყვეტილების მისაღებად გრანტის გამცემს მოსთხოვოს დამატებითი დოკუმენტაციის წარდგენა," — განაცხადა გორდულაძემ.

პარლამენტის ბიუროს სხდომაზე აღნიშნულ ცვლილებების წარდგენა 7 აპრილს მოხდა, კანონპროექტს დაჩქარებული წესით განიხილავენ.

საკანონმდებლო ცვლილების მიხედვით, აკრძალული გრანტის გაცემისა და მიღების მონიტორინგს ანტიკორუფციული ბიურო განახორციელებს.

მთავრობის მიერ გრანტის გაცემის თაობაზე თანხმობის გადაწყვეტილება მიიღება 10 დღის ვადაში და ამ გადაწყვეტილების გასაჩივრება არ აჩერებს მის მოქმედებას. აღნიშნული თანხმობის გარეშე გაცემული გრანტის მიღება აკრძალულია. წესი არ ვრცელდება საერთაშორისო სპორტული ასოციაციის, ფედერაციის და კომიტეტის მიერ გრანტის გაცემაზე, საქართველოს საზღვრებს გარეთ საშუალო და უმაღლესი განათლების მიღებისთვის და სამეცნიერო მუშაობისთვის გაცემულ ინდივიდუალურ სტიპენდიაზე, ისევე როგორც საქართველოში მოქმედი საერთაშორისო ორგანიზაციის მიერ გრანტის მიღებაზე.

მონიტორინგის მიზნებისთვის ანტიკორუფციული ბიურო უფლებამოსილია: პირისგან გამოითხოვოს ფინანსური ანგარიში, გამოჰკითხოს ფიზიკური პირი ამ კანონით დადგენილი წესით.

ანტინარკოტიკული კანონპროექტი

იურიდიულ საკითხთა კომიტეტის სხდომაზე ქართული ოცნების მიერ წარდგენილ ანტინარკოტიკულ კანონპროექტს III მოსმენით მხარი დაუჭირეს.

"თუ პირის გარეგნული ან/და ქცევითი მახასიათებლები ქმნის საკმარის საფუძველს ვარაუდისთვის, რომ პირი იმყოფება ნარკოტიკული საშუალების (გარდა ამ კოდექსის 45-ე პრიმა მუხლით გათვალისწინებული ნარკოტიკული საშუალებისა: მარიხუანა ან მცენარე კანაფი), მისი ანალოგის ან პრეკურსორის ზემოქმედების ქვეშ, პოლიციელი უფლებამოსილია პირს მოსთხოვოს საქართველოს შინაგან საქმეთა სამინისტროს საექსპერტო-კრიმინალისტიკურ დეპარტამენტში კლინიკური და ლაბორატორიული გამოკვლევის მიზნით გადაყვანა ან შესაბამისი მიმართვის საფუძველზე კლინიკური და ლაბორატორიული გამოკვლევის შედეგების არაუგვიანეს 24 საათისა წარმოდგენა." — 45-ე მუხლის მე-7 ნაწილში ცვლილება.

ნარკოპოლიტიკის გამკაცრების შესახებ კანონპროექტის ფარგლებში, სისხლის სამართლის კოდექსს, ერთ-ერთი სასჯელის სახით, სავალდებულო მკურნალობა დაემატება და პროკურორის მოთხოვნის საფუძველზე, შესაბამისი კომისია განიხილავს დაენიშნოს თუ არა ნარკოდამოკიდებულ პირს სავალდებულო მკურნალობა, რის შემდეგაც მოსამართლე საბოლოო გადაწყვეტილებას მიიღებს.