შინაგან საქმეთა სამინისტრო აცხადებს, რომ 1980 წელს დაბადებული პირი ჯანმრთელობის განზრახ მძიმე დაზიანების ბრალდებით დააკავეს.

გამოძიების ვერსიით მან დღეს, 19 დეკემბერს თელავში, აღმაშენებლის ქუჩაზე მდებარე ერთ-ერთი კომპანიის შენობაში, წარსულში არსებული პირადი კონფლიქტის გამო, საიგას სისტემის რეგისტრირებული ცეცხლსასროლი იარაღიდან გასროლით სხეულზე დაზიანებები მიაყენა სამ პირს.

შსს-ს მტკიცებით, პოლიციამ დანაშაულის ჩადენის იარაღი ნივთმტკიცებად ამოიღო. გამოძიება ჯანმრთელობის განზრახ მძიმე დაზიანების ფაქტზე, სისხლის სამართლის კოდექსის 117-ე მუხლის 1-ლი ნაწილით მიმდინარეობს.

19 დეკემბერს, გვიან ღამით, თელავში, აღმაშენებლის ქუჩაზე სამი პირი დაჭრეს. უწყების ცნობით, დაჭრილების სიცოცხლეს საფრთხე არ ემუქრება და ისინი სამედიცინო დაწესებულებაში გადიან შესაბამის მკურნალობას.