გაერთიანებულმა ოპოზიციამ ძალა ერთობაშია სხვა ოპოზიციურ პოლიტიკურ პარტიებთან კონსულტაციები დაიწყო. პირველი შეხვედრა ლეიბორისტული პარტიის ოფისში იმართება, რომელსაც რუსთავი 2-ის ცნობით, თითქმის ყველა ოპოზიციური ძალა ესწრება.

გაერთიანებული ოპოზიცია საპრეზიდენტო არჩევნების მეორე ტურის შედეგებს არ აღიარებს. მათი პოზიციით, არჩევნებზე გაყალბების უპრეცედენტო მაჩვენებელი დაფიქსირდა. ოპოზიცია რიგგარეშე საპარლამენტო არჩევნების ჩატარებასა და საარჩევნო კოდექსში ცვლილებებს ითხოვს. გაერთიანებული ოპოზიციის ყოფილმა პრეზიდენტობის კანდიდატმა მმართველ ძალას სამუშაო ჯგუფის შექმნისკენაც მოუწოდა, თუმცა ხელისუფლებამ მისი შეთავაზება არ მიიღო. ოპოზიციამ ხელისუფლებას ვადა 16 დეკემბრამდე, ანუ ინაუგურაციამდე მისცა. სწორედ ამ დღეს დააანონსეს მათ მორიგი აქციაც.