"28 ნოემბერს გავიღვიძეთ კრიმინალურ ზონაში, სადაც აღარც პოლიტიკური პროცესია, აღარც კონსტიტუცია, აღარც არჩევნები ტარდება და ყველაფერს განაგებენ სუს-ის მიერ ორგანიზებული კრიმინალების ბანდები", — ამ სიტყვებით გამოეხმაურა გაერთიანებული ოპოზიციის პრეზიდენტობის კანდიდატი, გრიგოლ ვაშაძე ქუთაისის აეროპორტში თაკო ჩარკვიანსა და მის ქმარზე თავდასხმას.

მისი თქმით, თავდამსხმელები იყვნენ გალიებიდან გამოშვებული "ბანდერლოგები".

"ეს არის ორგანიზებული კამპანია. არ გეგონოთ, რომ ეს იყო იზოლირებული მოვლენა. ისინი დილიდან მიზანმიმართულად ელოდებოდნენ ოჯახს აეროპორტში. ეს დაშინების კამპანია არის მართული ე.წ. ხელისუფლების მიერ, პოლიტიკური პოლიციის მიერ, რომელიც თავის თავს სუს-ს ეძახის და მასთან შეზრდილი კრიმინალების მიერ", — განაცხადა ვაშაძემ.

მისი თქმით, არ მისცემს ხელისუფლებას საშუალებას დააშინონ გაერთიანებული ოპოზიციის მხარდამჭერები, შტაბის აქტივისტები და ხელმძღვანელები.

"ჩვენ კანონმორჩილი ხალხი ვართ. კონსტიტუციის და კანონმდებლობის ფარგლებში, იგივეს მოვითხოვთ ე.წ. ხელისუფლებისგან - ნუ დაკარგავთ ადამიანის სახეს. ეცადეთ დარჩეთ ქართველობის და ადამიანობის ფარგლებში და ქალზე მაინც არ აღმართოთ ხელი", — განაცხადა გრიგოლ ვაშაძემ საგანგებო ბრიფინგზე.

თაკო ჩარკვიანსა და მის ქმარს ქუთაისის აეროპორტში თავს დაესხნენ. შინაგან საქმეთა სამინისტრომ 4 პირი დააკავა. უწყებამ ერთი პირი სისხლის სამართლის წესით ძალადობის ბრალდებით, ხოლო სამი პირი ადმინისტრაციული წესით წვრილმანი ხულიგნობის ბრალდებით დააკავა.