აშშ-ს პრეზიდენტი დონალდ ტრამპი აცხადებს, რომ უკრაინაში, ქერჩის სრუტეში მომხდარის გამო იგი რუსეთის პრეზიდენტთან, ვლადიმერ პუტინთან შეხვედრას ჩაშლის. ლიდერების შეხვედრა პირველ დეკემბერს, არგენტინაში, ინდუსტრიული სახელმწიფოების დიდი ოცეულის შეკრებაზე უნდა შემდგარიყო. ტრამპმა ამის შესახებ ტვიტერის საკუთარ გვერდზე დაწერა:

"გამომდინარე იქედან, რომ გემები და მეზღვაურები რუსეთიდან უკრაინაში არ დაბრუნდნენ, გადავწყვიტე პრეზიდენტ ვლადიმეტ პუტინთან ჩემი წინასწარ დაგეგმილი შევედრა გავაუქმო, რადგან ყველა მხარისთვის ასე აჯობებს. მე მოუთმენლად ველი მნიშვნელოვან სამიტს".

დიდი ოცეულის სამიტი 29 ნოემბრიდან პირველი დეკემბრის ჩათვლით არგენტინაში გაიმართება. სამიტის ფარგლებში რუსეთისა და აშშ-ს პრეზიდენტების შეხვედრა იყო ჩანიშნული.

ქერჩის კრიზისი

25 ნოემბერს რუსულმა მხარემ სამ უკრაინულ გემს ქერჩის სრუტეში ცეცხლი გაუხსნა და შემდეგ დააკავა. გავრცელებული ინფორმაციით, უკრაინის მხრიდან რამდენიმე დაჭრილი და მძიმედ დაშავებულია.

კრიზისი მაშინ დაიწყო, როცა რუსულმა მხარემ უკრაინული გემები თავისი საზღვაო ტერიტორიის დარღვევაში დაადანაშაულა. 25 ნოემბერს, დილით, უკრაინული გემები "ბერდიანსკი" და "ნიკოპოლი", ბუქსირ "იანა კაპასთან" ერთად შავი ზღვის ტერიტორიიდან აზოვის ზღვაში მიცურავდნენ ქერჩის სრუტის გავლით. ეს არის ერთადერთი გზა ამ მიმართულებით წასასვლელად, რომლის აკვატორიასაც რუსეთი და უკრაინა იზიარებენ.

უკრაინული მხარე ამბობს, რომ რუსეთმა პროვოკაცია მოაწყო. მათი მტკიცებით, რუსული გემი უკრაინელების ბუქსირს განგებ შეეჯახა, რის შედეგადაც ბუქსირის რამდენიმე ნაწილი მნიშვნელოვნად დაზიანდა. შეჯახების შემდეგ უკრაინულმა გემებმა მარიოპოლისის მიმართულებით ცურვა განაგრძეს, თუმცა რუსულმა მხარემ ქერჩის სრუტეზე გამავალი ხიდის ქვეშ ტანკერი ჩააყენეს და უკრაინულ გემებს გზის გაგრძელების საშუალება არ მისცეს. მოგვიანებით, ადგილზე რუსული ვერტმფრენებიც გამოჩნდნენ, რათა ტერიტორია გაეკონტროლებინათ.

რუსული მხარის განცხადებით, ამ მოქმედებებს უსაფრთხოების ზომების მისაღებად ახორციელებდნენ. ამ ფაქტს უკრაინული მხარე უარყოფს. მათი მტკიცებით, გემების გადაადგილების მარშუტი წინასწარ იყო შეთანხმებული რუსულ მხარესთან.