"დღეს ჩვენი პარტნიორობის კიდევ ერთი განსაკუთრებული ეტაპია", — განაცხადა პრეზიდენტმა ჟან-კლოდ იუნკერმა. დღეს, 21 ნოემბერს ევროკომისრებმა პრეზიდენტ ჟან-კლოდ იუნკერის ხელმძღვანელობით და საქართველოს მთავრობის წევრებმა ბრიუსელში მაღალი დონის შეხვედრა გამართეს.

"დღეს ევროკავშირი საქართველოს ნომერ პირველი სავაჭრო პარტნიორია, რომელთანაც ურთიერთობა მისი მთლიანი ვაჭრობის 27%-ს შეადგენს", — განაცხადა ევროპული სამეზობლო პოლიტიკისა და გაფართოების შესახებ მოლაპარაკებების საკითხებში ევროკომისარმა იოჰანეს ჰანმა.

ევროკავშირი და საქართველო 25-ზე მეტ კონკრეტულ ქმედებაზე შეთანხმდნენ სამ პრიორიტეტულ სფეროში, რომელიც ხელს შეუწყობს თანამშრომლობას ასოცირების შესახებ შეთანხმების ფარგლებში:

ეკონომიკა, ვაჭრობა და კავშირი

საქართველოში 18 პრიორიტეტული სატრანსპორტო საინვესტიციო პროექტისთვის 3,4 მილიარდი ევრო გამოიყო. სამოქმედო გეგმა განსაზღვრავს 18 პრიორიტეტულ პროექტს ყველა ტრანსპორტის სახეობისთვის - სარკინიგზო, საავტომობილო, პორტისა და აეროპორტისთვის - ხალხის, ტვირთის და მომსახურების მობილობის გასაუმჯობესებლად.

45 მილიონი ევროს ოდენობის მაკრო-ფინანსური დახმარება

2018 წლის აპრილში ევროკომისიამ საქართველოსთვის მაკრო-ფინანსური დახმარების მესამე პაკეტი დაამტკიცა. 45 მილიონი ევროს ღირებულების პროგრამის დანერგვა ხელს შეუწყობს საქართველოს ეკონომიკურ რეფორმებს, ისევე როგორც მისი საგარეო დაფინანსების საჭიროებებს, რაც საერთაშორისო სავალუტო ფონდთან არსებულ საქართველოს პროგრამას შეავსებს.

27 მილიონი ევრო გაუმჯობესებული ენერგოეფექტურობისთვის

ევროკომისია საერთაშორისო დაფინანსების ინსტიტუტებთან ერთად განახორციელებს ინვესტიციებს საჯარო შენობებში ენერგოეფექტურობის სტანდარტების დასანერგად.

საქართველოში მაღალსიჩქარიანი ფართოზოლოვანი ინტერნეტ ინფრასტრუქტურის მხარდაჭერა

ევროკავშირი აგრძელებს მაღალსიჩქარიანი ფართოზოლოვანი ინტერნეტ კავშირების განსავითარებლად, განსაკუთრებით სოფლად, ევროკავშირის 4Digital ინიციატივის საშუალებით, ასევე ფართოზოლოვანი ინტერნეტ ინფრასტრუქტურის სტრატეგიის მიღებასა და განვითარებასთან დაკავშირებით მსოფლიო ბანკთან თანამშრომლობით.

დამატებითი მხარდაჭერა სოფლის მეურნეობისა და სოფლის განვითარებისთვის

ევროკავშირი მიზნად ისახავს საექსპორტო შესაძლებლობების გაუმჯობესებას ევროკავშირის სტანდარტებთან დაახლოების გზით, კერძოდ სურსათის უვნებლობის სფეროში.

100 მილიონი ევროს ოდენობის დამატებითი დახმარება, რათა მცირე და საშუალო საწარმოებს ჰქონდეს ფინანსებზე წვდომა ადგილობრივ ვალუტაში

2009 წლიდან ევროკავშირმა მხარი დაუჭირა საქართველოში 63 000-ზე მეტ მცირე, საშუალო და მიკრო საწარმოს ფინანსებზე წვდომას, დაახლოებით 700 მილიონი ევროს ოდენობის სესხების საშუალებით სამუშაო ადგილების შექმნისა და ექსპორტის გაზრდის მიზნით. 100 მილიონი ევროს ღირებულების ახალი პროგრამები ხელს შეუწყობს ადგილობრივ ვალუტაში ფინანსების ხელმისაწვდომობას. საგარეო საინვესტიციო გეგმის გარანტია საშუალებას მისცემს საქართველოში ახალი საინვესტიციო პროექტების განხორციელებას.

ევროკომისარმა იოჰანეს ჰანმა და საქართველოს საგარეო საქმეთა მინისტრმა დავით ზალკალიანმა ხელი მოაწერეს 49 მილიონი ევროს ღირებულების ხელშეკრულებას, რომლითაც ევროკავშირი ხელს შეუწყობს ეკონომიკურ და ბიზნეს განვითარებას საქართველოში.

ევროკავშირი და საქართველო ერთობლივად იმუშავებენ ბიზნესისთვის უკეთესი სამართლებრივი სისტემის, ფინანსური მომსახურების მოდერნიზაციისა და ინოვაციური ბიზნეს მოდელების განსავითარებლად.

განათლება, კვლევა და ინოვაცია

ევროპული სკოლა, რომელიც წელს სექტემბერში კომისარმა ჰანსმა გახსნა, სტუდენტებს აღმოსავლეთ პარტნიორობის ყველა ქვეყნიდან მიიღებს. ევროკავშირი და საქართველო ფინანსური და ექსპერტული წვლილის შეტანის საშუალებით ხელს შეუწყობენ საშუალო სკოლის დამამთავრებელი კლასების სპეციალიზირებული კურიკულუმების და ასევე ახალი ვებ-გვერდის შემუშავებს.

7,5 მილიონი ევრო დამატებით აკადემიურ და სამეცნიერო გაცვლითი პროგრამებისთვის
2015 წლიდან 2 500-ზე მეტი სტუდენტი და აკადემიური პერსონალი სწავლობდა ან ასწავლიდა ევროკავშირის ერაზმუს+ პროგრამის ფარგლებში. ევროკავშირი საქართველოს დამატებით ტექნიკურ და ფინანსურ დახმარებას გამოუყოფს სტუდენტური და სამეცნიერო გაცვლითი პროგრამების რაოდენობის გასაზრდელად.

ევროკომისარმა ჰანმა და საგარეო საქმეთა მინისტრმა ზალკალიანმა ხელი მოაწერეს 48 მილიონ ევრომდე ღირებულების ხელშეკრულებას, რომელიც უნარების განვითარებასა და შრომის ბაზრის მოთხოვნებთან მათ შესაბამისობას დააფინანსებს. 2019 წლიდან ევროკავშირი ხელს შეუწყობს ცხოვრების განმავლობაში უწყვეტი სწავლების უნარ-ჩვევების, სამეწარმეო სწავლებისა და მეწარმეობის შესაძლებლობების უზრუნველყოფას საქართველოს ოთხ რეგიონში, მათ შორის აფხაზეთის თვითგამოცხადებულ რეგიონში.

მართლმსაჯულება და შიდა უსაფრთხოება

ევროკომისია და საქართველო კიდევ უფრო მჭიდროდ იმუშავებენ კატასტროფების პრევენციის, მზაობისა და რეაგირების საკითხებზე, როგორიცაა ტყის ხანძრები, წყალდიდობა და საძიებო და სამაშველო მისიები. საქართველო ასევე მიიღებს წვდომას ევროკომისიის ერთობლივი კვლევითი ცენტრის კატასტროფების რისკის მართვის ინსტრუმენტებზე და ევროკავშირის დედამიწიაზე დაკვირვების პროგრამა "კოპერნიკის" ინფორმაციისა და შედეგებისგან სარგებლის მიღებას გააგრძელებს.

27 მილიონი ევრო საქართველოს მოქალაქეების უსაფრთხოების გასაზრდელად
ევროკავშირი საქართველოში კარგი მმართველობისა და კანონის უზენაესობის დასახვეწად დანაშაულის პრევენციასა და მასთან ბრძოლას, სამოქალაქო დაცვის გაუმჯობესებას და უსაფრთხოების სექტორზე კონტროლის გაზრდის ხელშეწყობას ახალი პროგრამის საშუალებით გააძლიერებს.

საქართველოს კიბერუსაფრთხოების გაძლიერება

ევროკავშირი ხელს შეუწყობს საქართველოსა და აღმოსავლეთ პარტნიორობის სხვა ქვეყნების კიბერუსაფრთხოების გამოწვევებისადმი მდგრადობის გაუმჯობესებას და სისხლის სამართლის სამართალწარმოების საპასუხო ქმედებების გაძლიერებას.