დღეს დილით, 21 ნოემბერს, თბილისის საერთაშორისო აეროპორტში, მოსკოვი-თბილისის რეისით ჩამოფრენილი რუსეთის სამი მოქალაქე ქვეყანაში არ შემოუშვეს და უკან გააბრუნეს. ამის შესახებ ინფორმაცია On.ge-ს შინაგან საქმეთა სამინისტრომ მიაწოდა.

ტელეკომპანია რუსთავი 2-ის ინფორმაციით, მგზავრები რუსულ კინემატოგრაფიულ ფესტივალზე, "პაემანი რუსეთთან" დასასწრებად ჩამოდიოდნენ. მათივე ცნობით, ერთ-ერთი, ვინც რუსეთში გააბრუნეს, იყო ფესტივალის გენერალური პროდიუსერი, ვლადიმერ პიროჟოკი, მწერალი, რეჟისორი და საბავშვო ტელეჟურნალ "ერალაშის" სამხატვრო ხელმძღვანელი, ბორის გრაჩევსკი და რუსი მწერალი, ვიქტორ ეროფეევი.

Sputnik-ის ინფორმაციით, 2017 წლის 28 ოქტომბერს, ვლადიმერ პიროჟოკი აფხაზეთში იყო, იმავე ფესტივალზე დასასწრებად.

შს მინისტრის, გიორგი გახარიას თქმით, დარღვეული იყო ოკუპაციის შესახებ კანონი:

"ეს ხდებოდა რამდენიმე საათის უკან, როდესაც ჩვენ გზაში ვიყავით. რეალურად, ჩვენ მივიღეთ ის გადაწყვეტილება, რა გადაწყვეტილებაც უნდა მიგვეღო. ჩვენ ბევრი საბაბი გვაქვს იმისთვის, რომ არასასურველი ადამიანები, მოქალაქეები ჩვენს ქვეყანაში არ შემოვუშვათ".

შს მინისტრის განცხადების მიუხედავად, მათ არ გამოიყენეს ოკუპაციის შესახებ კანონი. სამინისტროში ამბობენ, რომ რეჟისორებს ქვეყანაში შემოსვლაზე უცხოელთა და მოქალაქეობის არმქონე პირთა სამართლებრივი მდგომარეობის შესახებ საქართველოს კანონის მე-11 მუხლის პირველი პუნქტის ი ქვეპუნქტის საფუძველზე უთხრეს უარი. ამავე მუხლის ი ქვეპუნქტში, უცხოელის საქართველოში შემოსვლაზე უარის თქმის კონკრეტული საფუძველი განმარტებული არ არის.

ფესტივალის "პაემანი რუსეთთან" პარტნიორია საინფორმაციო სააგენტო და რადიო Sputnik–საქართველო.