თბილისის საქალაქო სასამართლოში პარტია მოქალაქეების ლიდერის, ალეკო ელისაშვილის სასამართლო პროცესი გაიმართა. ოპოზიციონერი პოლიტიკოსის წინააღმდეგ სისხლის სამართლის მე-4 საქმე არსებითი განხილვის ეტაპზე გადავიდა.

ელისაშვილს სასამართლო პროცესზე მოწმისთვის შეურაცხყოფის მიყენებას ედავებიან. "დაზარალებული" მოწმე პოლიციელი დიდუბე-ჩუღურეთის სახაზო-საპატრულო სამმართველოს უფროსის მოადგილე შოთა ჭიპაშვილია. ის ელისაშილის ტერორიზმის საქმეზე მოწმის სახით იკითხებოდა, რა დროსაც ელისაშვილმა მას "არაკაცი" უწოდა.

ელისაშვილმა დღევანდელ პროცესზე მისთვის წარდგენილ ახალ ბრალზე ისაუბრა და მოსამართლეს განუცხადა, რომ მან პოლიციელს "არაკაცი" ნამდვილად დაუძახა.

"პროკურატურას 30 მოწმე ჰყავს მარტო იმასთან დაკავშირებით, მართლა დავუძახე თუ არა სადისტ პოლიციელს არაკაცი. დავუძახე!

ციხეში, თაკარა მზეში გამომძიებლები მოვიდნენ, რამდენი ფურცელი, მელანი და ბენზინი დახარჯა სახელმწიფომ მარტო იმის დადგენაში, მართლა დავუძახე თუ არა "არაკაცი". დავუძახე, არ უარვყოფ!" — ამბობს ალეკო ელისაშვილი [რადიო თავისუფლება].

მისი განცხადებით, სწორედ ჭიპაშვილი იყო ის პოლიციელი, რომელმაც დაკავებისას ხელბორკილები მჭიდროდ დაადო და უარს ეუბნებოდა მის წინ გადმოტანაზე.

"ორ დანაშაულზე იყო იმ პროცესზე საუბარი, პირველი, ხელბორკილები 4 საათი არ მომხსნეს და მარცხენა ხელიდან სისხლი მომდიოდა. "წინ მაინც დამიმაგრეთ ეს ხელბორკილები-მეთქი", ზუსტად იმ პოლიციელს [დავით ჭიპაშვილი — რ.თ.] ვეუბნებოდი. თავის ქვეშევრდომ პოლიციელს უკრძალავდა ხელბორკილების მოხსნას.

ორი პოლიციელი იყო იმ პროცესზე მოსული. ერთი შევაქე, ადამიანი იყო და იმიტომ. მეორეს არაკაცი დავუძახე. წყალი, რომ ვითხოვე, ერთი ცდილობდა მოეწოდებინა და ეს ჭიპაშვილი, მართლა არაკაცი, ეუბნებოდა, არ დაალევინოო. დაინახეს, რომ სისხლი მომდიოდა მარცხენა ხელიდან და მაჯები მქონდა დახეთქილი.

ტკბებოდა პოლიციელი იმის ყურებით და ცქერით, რომ სისხლი მომდიოდა მაჯებიდან, ბედნიერი იყო. არაფერს ვიგონებ და მეორე დანაშაული იყო ის, რომ ასეთ ადამიანს არაკაციც დავუძახე, "ახვარიც" და "ნაბიჭვარიც", იმსახურებდა.

ეს პოლიციელი მოქმედი პოლიციელია.

ასეთ ქვეყანაში ვცხოვრობთ. აი, ასეთ ქვეყანაში ვცხოვრობთ. მე არაფერი დამკლებია, უბრალოდ გაოგნებული ვარ, რანაირი ხალხი მუშაობს პოლიციაში? სად არის იმ საქმის გამოძიება? შეწყვიტეს! დანაშაულის ნიშნები არ არისო.

იზოლატორში დაფიქსირებული იყო ხელები დაჩეხილი რომ მქონდა. მე ხომ არ დავიჩეხავდი არა? მკურნალობაც ჩამიტარეს, იქ ორი კვირა მიმკურნალეს მაჯებზე. ამით დაინტერესდით? იქნებ მე თვითონ დავიზიანე ეს მაჯები?..." — ამბობს ალეკო ელისაშვილი [რადიო თავისუფლება].

პროკურატურის ვერსია

მიმდინარე წლის 31 ივლისს პროკურატურამ ალეკო ელისაშვილს ბრალი სისხლის სამართლის კოდექსის 366-ე მუხლითაც წარუდგინა, რაც გულისმობს "სასამართლოს უპატივცემულობა, რაც გამოიხატა მონაწილის შეურაცხყოფით". აღნიშნული მუხლი ერთ წლამდე თავისუფლების აღკვეთას ითვალისწინებს. შოთა ჭიპაშვილი ელისაშვილის ტერორიზმის საქმეზე მოწმის სახელით დაიკითხა.

საქმის პროკურორ დავით დევიძის განცხადებით, ელისაშვილმა პოლიციელს სხვა შეურაცხმყოფელი სიტყვებიც უწოდა, "რომელსაც ვერ გავაჟღერებ იმდენად შეურაცხმყოფელია". პროკურორი პოლიციელის მხრიდან ელისაშვილზე ძალადობას უარყოფს.

"ალექსანდრე ელისაშვილის მიმართ ძალადობის ჩადენას ადგილი არ ჰქონია, მის მიმართ ძალადობა არ განუხორციელებია არც მანდატურის თანამშრომლებს და არც საპატრული პოლიციის თანამშრომლებს.

ნებისმიერი პიროვნება შეურაცხყოფილად იგრძნობდა თავს აღნიშნული სიტყვების გაგონების შემდეგ, არა მარტო "არაკაცი", არამედ სხვა შეურაცხმყოფელი სიტყვები უწოდა, რომელსაც ვერ გავაჟღერებ იმდენად შეურაცხმყოფელია," — ამბობს პროკურორი.

ალეკო ელისაშვილის საქმეები

ალეკო ელისაშვილის წინააღმდეგ ჯამში 4 ბრალდება/ეპიზოდი ფიგურირებს.

1. ძალადობის გამოყენებით ჩადენილი დევნა — 2024 წლის დეკემბერში ელისაშვილი დააკავეს ქართული ოცნების წევრ ალი ბაბაევზე განხორციელებული თავდასხმის გამო.

მას ბრალი სსკ-ის 156-ე მუხლის მე-2 ნაწილის "ა" ქვეპუნქტით აქვს წარდგენილი, რაც ძალადობით დევნას გულისხმობს;

2. ტერორისტული აქტის მცდელობა (I ეპიზოდი). ბრალდების თანახმად, ალეკო ელისაშვილმა 2025 წლის 29 ნოემბერს სასამართლო კანცელარიის დაწვა ცადა.

3. ტერორისტული აქტის მცდელობა (II ეპიზოდი). ოპოზიციონერმა პოლიტიკოსმა სასამართლო კანცელარიის დაწვა 2026 წლის მარტშიც ცადა;

ტერორიზმი მუხლით წარდგენილ ბრალდებებზე ელისაშვილს 13 წლით თავისუფლების აღკვეთა მიესაჯა.