შინაგან საქმეთა სამინისტროს ინფორმაციით, ქურდული სამყაროს წევრობისა და გამოძალვის ბრალდებით ერთი პირი დააკავეს. უწყების ინფორმაციით, ბრალდებული რუსთავში დააპატიმრეს.

გამოძიების ინფორმაციით, ბრალდებული გარდაბნის რაიონში მცხოვრებ მოქალაქეს სიცოცხლის მოსპობის, ცოლ-შვილის მოკვლისა და ქონების განადგურების მუქარით 3 000 ამერიკულ დოლარს სძალავდა.

"დაზარალებულის დასაშინებლად ბრალდებულმა მის საცხოვრებელ სახლს ცეცხლმოკიდებული ბოთლი ესროლა, შემთხვევის შედეგად არავინ დაშავებულა", — განმარტებულია შსს-ს მიერ გავრცელებულ განცხადებაში.

საქმეზე გამოძიება საქართველოს სისხლის სამართლის კოდექსის 181-ე მუხლის პირველი და 223-ე პრიმა მუხლის პირველი ნაწილით მიმდინარეობს. ამ მუხლებით ჩადენილი დანაშაულისთვის შვიდიდან ათ წლამდე პატიმრობაა გათვალისწინებული.