ფეისბუქზე პრორუსული გამოცემის სპუტნიკის წინააღმდეგ კამპანია დაიწყო #შეაჩერესპუტნიკი. აქციის ავტორები სხვადასხვა მემეს ავრცელებენ სპუტნიკის ფეისბუქგვერდზე და ზოგადად ფეისბუქში.

აქციის მიზანია ებრძოლონ პრორუსულ საინფორმაციო გამოცემას, რომელიც ცნობილია რუსული პროპაგანდითა და დეზინფორმაციით საქართველოში. სოციალური კამპანიის ავტორების თქმით, სპუტნიკი კრემლის ინტერესების გამტარებელია, რასაც ქართული საზოგადოება უნდა შეეწინააღმდეგოს.

მემეები, რომელიც ფეისბუქზე ვრცელდება:

შპს სპუტნიკ ჯორჯია საქართველოში საჯარო რეესტრში ოფიციალურად 2015 წლის 23 იანვარს დარეგისტრირდა. სპუტნიკი მულტიმედიური საერთაშორისო პროექტია, რომელიც რუსეთის პრეზიდენტის 2013 წლის 9 დეკემბრის ბრძანების საფუძველზე შეიქმნა. სპუტნიკმა, რომელსაც რუსეთის მთავრობა ფლობს და აფინანსებს საერთაშორისო არენაზე საინფორმაცია სააგენტო RIA Novosti და რუსეთის ხმა ჩაანაცვლა. მედია პლატფორმა, რომელსაც დიმიტრი კისილიოვი ხელმძღვანელობს, 34 ქვეყნის 130 ქალაქში 30 ენაზე მაუწყებლობას გეგმავდა. მას აქვს ბიუროები ოკუპირებულ აფხაზეთსა და ოსეთში.

კისილიოვი ცნობილი ჟურნალისტია - კაცი, რომელსაც თავის ტელეპროგრამაში, მაგალითად, ნათქვამი აქვს, რომ რუსეთს შეუძლია შეერთებული შტატების რადიაქტიურ ფერფლად გადაქცევა. ახლა კისელიოვი სააგენტო "სპუტნიკის" ამოცანად ასახელებს დასავლურ "პროპაგანდასთან" დაპირისპირებას, რაშიც მას ხელი უნდა შეუწყოს ინფორმაციის 30-მდე ენაზე გავრცელებამ.

საქართველოში სპუტნიკი ყოფილი რია ნოვოსტის ოფისშია განთავსებული. მითების დეტექტორის ინფორმაციით, აღნიშულ ოფისში პრესკონფერენციები გამართეს "მრავალეროვანი საქართველოს ანტიფაშისტურმა კოალიციამ" (რევაზ გოგიძე, გენერალი ტრისტან წითელაშვილი); "ევრაზიის ინსტიტუტის" თანამშრომელმა შოთა აფხაიძემ, "საქართველოს სლავი ხალხების ნაციონალური კონგრესმა"; "საქართველოს ძალოვან ვეტერანთა და პატრიოტთა პოლიტიკური მოძრაობამ" (ნოდარ ცოტნიაშვილი) და სხვებმა.

2017 წლის იანვარში აშშ-ის დაზვერვამ დაასკვნა, რომ კრემლი RT-სა და სპუტნიკს ამერიკის 2016 წლის საპრეზიდენტო არჩევნებზე გავლენის მოსახდენად იყენებდა. 2017 წლის 26 ოქტომბერს Twitter-მა Russia Today (RT)-სა და Sputnik-ის კუთვნილი ანგარიშებიდან რეკლამის განთავსება აკრძალა. ტვიტერმა გადაწყვეტილება აშშ-ის 2016 წლის საპრეზიდენტო არჩევნებზე და მასში რუსეთის მონაწილეობაზე აშშ-ს დაზვერვის დასკვნის საფუძველზე მიიღო.