Twitter-მა Russia Today (RT)-სა და Sputnik-ის კუთვნილი ანგარიშებიდან რეკლამის განთავსება აკრძალა. ტვიტერმა გადაწყვეტილება აშშ-ის 2016 წლის საპრეზიდენტო არჩევნებზე და მასში რუსეთის მონაწილეობაზე აშშ-ს დაზვერვის დასკვნის საფუძველზე მიიღო:

"ამ გადაწყვეტილებამდე მარტივად არ მივსულვართ", - აცხადებს ტვიტერი.

RT-ს ისევ ექნება საშუალება შეინარჩუნოს ტვიტერის ანგარიში, თუმცა ტვიტების პრომოუშენში ფულის გადახდა აეკრძალებათ.

პირველ ნოემბერს, ტვიტერის გენერალური საბჭო, Facebook-ისა და Google-ის წარმომადგენლებთან ერთად, 2016 წლის არჩევნებთან დაკავშირებით მიმდინარე გამოძიებაზე ვაშინგტონში ჩვენებას მისცემს.

ტვიტერის გადაწყვეტილებით, RT-ის რეკლამებიდან მიღებული 1,9 მილიონი დოლარის შემოსავალი გადაერიცხება კვლევას, რომელიც არჩევნებთან მიმართებით დეზინფორმაციის გავრცელებისთვის ტვიტერის გამოყენებას გამოიკვლევს.