რესპუბლიკური პარტიის თავმჯდომარის, ხათუნა სამნიძის განცხადებით, არჩევნების მეორე ტურში გაერთიანებული ოპოზიციის კანდიდატს, გრიგოლ ვაშაძეს დაუჭერენ მხარს. სამნიძის თქმით, პარტიის წევრებმა დღესაც ხელისუფლების მხარდაჭერილი კანდიდატის წინააღმდეგ მისცეს ხმა და მეორე ტურშიც ასე მოიქცევიან. ამის შესახებ მან რუსთავი 2-ის ეთერში ისაუბრა.

სამნიძემ აღნიშნა, რომ დავით ბაქრაძის საქციელი ღირსეულია. ბაქრაძემ ევროპული საქართველოს დაკვეთილი ეგზიტპოლის შედეგების გამოქვეყნების შემდეგ განაცხადა, რომ მეორე ტურში მხარს ვაშაძეს დაუჭერს.

მეორე ტურის გამართვა აღიარა ქართული ოცნების თავმჯდომარემ, ირაკლი კობახიძემაც. მისი თქმით, მეორე ტურში ვაშაძე და ზურაბიშვილი გადავლენ.

ცენტრალური საარჩევნო კომისიიის წინასწარი მონაცემებით, რომელიც 512 უბნის შედეგებს ეყრდნობა არჩევნების მეორე ტური გაიმართება. ცესკოს თავმჯდომარის, თამარ ჯვანიას განცხადებით, ამ ეტაპზე ლიდერობს სალომე ზურაბიშვილი 40,05%-ით და მეორე ადგილზეა გრიგოლ ვაშაძე 37,93%-ით.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით მათმა მხარდაჭერილმა კანდიდატმა, სალომე ზურაბიშვილმა გაიმარჯვა. მათი თქმით, 28.1 % აქვს გაერთიანებული ოპოზიციის კანდიდატს, გრიგოლ ვაშაძეს და 9.2% ევროპული საქართველოს კანდიდატს, დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

რუსთავი 2-ის მიერ ჩატარებული ეგზიტპოლის შუალედური შედეგებითაც სალომე ზურაბიშვილს და გრიგოლ ვაშაძეს 40-40% ქონდათ, დავით ბაქრაძეს კი — 10%.