ევროპული საქართველოს პრეზიდენტობის კანდიდატმა, დავით ბაქრაძემ დამარცხება აღიარა და აღნიშნა, რომ მეორე ტურის არსებობის შემთხვევაში მისი პარტია გაერთიანებული ოპოზიციის კანდიდატს, გრიგოლ ვაშაძეს დაუჭერს მხარს. ამის შესახებ ბაქრაძემ მას შემდეგ ისაუბრა, რაც მათი დაკვეთით ბი-სი-ჯის მიერ ჩატარებული კვლევის მონაცემები გახდა ცნობილი.

"მიუხედავად იმისა, რომ ამ არჩევნებზე ევროპული საქართველოს მხარდამჭერი ხმები იქნება ბევრად მეტი, ვიდრე ეს იყო 2017 წლის თვითმმართველობის არჩევნებზე, ეს ხმები არ აღმოჩნდა საკმარისი გამარჯვებისთვის", — აღნიშნა ბაქრაძემ და ამომრჩეველს მადლობა გადაუხადა.

დავით ბაქრაძის განცხადებით, ეგზიტპოლების შედეგები ადასტურებს იმას, რომ ოპოზიციას გამარჯვების რეალური შანსი გააჩნია მეორე ტურში.

ევროპულმა საქართველომ და ერთიანმა ნაციონალურმა მოძრაობამ საპრეზიდენტო არჩევნებისთვის სამპუნქტიან შეთანხმებას 11 ივლისს მოაწერეს ხელი. შეთანხმების თანახმად წინასაარჩევნო კამპანიის დროს პარტიებმა ერთმანეთზე შეტევისა და კრიტიკისგან თავი უნდა შეიკავონ და მეორე ტურში ერთმანეთის კანდიდატს დაუჭირონ მხარი.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით სალომე ზურაბიშვილმა გაიმარჯვა. მათი თქმით, 28.1 % აქვს გრიგოლ ვაშაძეს და 9.2% დავით ბაქრაძეს.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

მეორე ტური იმართება რუსთავი 2-ის მიერ ჩატარებული ეგზიტპოლის შედეგებითაც. 16:00 საათის შედეგებით სალომე ზურაბიშვილს და გრიგოლ ვაშაძეს 40-40% აქვთ, დავით ბაქრაძეს კი — 10%. რუსთავი 2-ისთვის კვლევა გასული წლების მსგავსად კომპანია ედისონ რისერჩმა ჩაატარა. შედეგებში ცდომილების ფარგლები +/-3%-ია, გამოკითხვა 115 უბანზე ჩატარდა.