პარლამენტის თავმჯდომარემ, ირაკლი კობახიძემ აღიარა, რომ საპრეზიდენტო არჩევნების მეორე ტური გაიმართება. კობახიძის თქმით, მეორე ტურში მმართველი პარტიის მხარდაჭერილი კანდიდატი სალომე ზურაბიშვილი და გაერთიანებული ოპოზიციის კანდიდატი, გრიგოლ ვაშაძე გადავლენ.

"ეს არის ნორმალური მოვლენა, ცხადია, რომ ყოველი მეორე მხარს უჭერს სწორედ ქართულ ოცნებას, თუმცა გამარჯვებისთვის ცოტა დაგვაკლდა", — განაცხადა კობახიძემ. მისი თქმით, უკვე დათვლილია 1000-მდე უბანი და ზურაბიშვილი ლიდერობს.

რუსთავი 2-ის ეგზიტპოლის გამოქვეყნების შემდეგ On.ge-ს კითხვას გაიმართება თუ არა მეორე ტური მმართველ პარტიაში არ პასუხობდნენ. მათი თქმით, ყველაფერს ცესკოს მონაცემები გადაწყვეტს.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით სალომე ზურაბიშვილმა გაიმარჯვა. მათი თქმით, 28.1 % აქვს გრიგოლ ვაშაძეს და 9.2% დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

მეორე ტური იმართება რუსთავი 2-ის მიერ ჩატარებული ეგზიტპოლის შედეგებითაც. 16:00 საათის შედეგებით სალომე ზურაბიშვილს და გრიგოლ ვაშაძეს 40-40% აქვთ, დავით ბაქრაძეს კი — 10%. რუსთავი 2-ისთვის კვლევა გასული წლების მსგავსად კომპანია ედისონ რისერჩმა ჩაატარა. შედეგებში ცდომილების ფარგლები +/-3%-ია, გამოკითხვა 115 უბანზე ჩატარდა.