რუსთავი 2-ის მიერ დაკვეთილი ეგზიტპოლით, 16:00 საათის შედეგებით საპრეზიდენტო არჩევნების მეორე ტური გაიმართება. შედეგები შემდეგნაირად გადანაწილდა: სალომე ზურაბიშვილს და გრიგოლ ვაშაძეს 40-40% აქვთ, დავით ბაქრაძეს კი — 10%.

ლეიბორისტული პარტიის კანდიდატმა, შალვა ნათელაშვილმა ხმების 3% მიიღო, გირჩის კანდიდატმა, ზურა ჯაფარიძემ კი — 2.

რუსთავი 2-ისთვის კვლევა გასული წლების მსგავსად კომპანია ედისონ რისერჩმა ჩაატარა. შედეგებში ცდომილების ფარგლები +/-3%-ია, გამოკითხვა 115 უბანზე ჩატარდა. პარალელურად ეგზიტპოლებს ატარებდა მმართველი პარტია ქართული ოცნება და ევროპული საქართველო.

მმართველი პარტიის კვლევით სალომე ზურაბიშვილმა გაიმარჯვა. ევროპული საქართველოს კვლევით კი გაერთიანებული ოპოზიცის კანდიდატმა, გრიგოლ ვაშაძემ.

თვალი ადევნეთ On.ge-ს ლაივს მმართველი პარტიის მხარდაჭერილი კანდიდატის, სალომე ზურაბიშვილის და გაერთიანებული ოპოზიციის კანდიდატის, გრიგოლ ვაშაძის საარჩევნო შტაბებიდან:

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით სალომე ზურაბიშვილმა გაიმარჯვა. მათი თქმით, 28.1 % აქვს გრიგოლ ვაშაძეს და 9.2% დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

მეორე ტური იმართება რუსთავი 2-ის მიერ ჩატარებული ეგზიტპოლის შედეგებითაც. 16:00 საათის შედეგებით სალომე ზურაბიშვილს და გრიგოლ ვაშაძეს 40-40% აქვთ, დავით ბაქრაძეს კი — 10%. რუსთავი 2-ისთვის კვლევა გასული წლების მსგავსად კომპანია ედისონ რისერჩმა ჩაატარა. შედეგებში ცდომილების ფარგლები +/-3%-ია, გამოკითხვა 115 უბანზე ჩატარდა.

მასალის თავდაპირველ ვერსიაში აღნიშნული იყო, რომ ევროპული საქართველოს ეგზიტპოლით გრიგოლ ვაშაძემ გაიმარჯვა.