IBM-ის, ვატერლოოს უნივერსიტეტის და მიუნხენის ტექნიკური უნივერსიტეტის (TUM) მკვლევარების ჯგუფმა, დღეს იმ ექსპერიმენტის შედეგები გამოაქვეყნა, რომელშიც პრაქტიკულად მტკიცდება, რომ კვანტურ კომპიუტერებს ისეთი ამოცანების გადაწყვეტა შეუძლიათ, რომლებიც კლასიკურებისთვის პრინციპულად შეუძლებელია. ეს მომენტი ნამდვილად შეიძლება გარდამტეხი აღმოჩნდეს კომპიუტერული მეცნიერებების ისტორიაში.

კომპიუტერულ მეცნიერებაში სპეციალური ტერმინიც არსებობს — კვანტური უპირატესობა, რომელიც სწორედ იმას გულისხმობს, რომ კვანტურ კომპიუტერებს ისეთი ალგორითმების "გაშვება" და გამოთვლების ჩატარება შეეძლებათ, როგორიც ჩვეულებრივი, თანამედროვე კომპიუტერებისთვის დღეს (და ძალიან შორეულ მომავალშიც) შეუძლებელია. ამ დრომდე მსგავსი რამ პრაქტიკულად ნაჩვენები არსად ყოფილა.

დღეიდან კვანტური უპირატესობა დავის საგანი აღარ არის.

ერთ-ერთი ავტორი, TUM-ის რობერტ კონიგი, Phys.org-თან ინტერვიუში ამბობს: "ჩვენმა ექსპერიმენტმა პრაქტიკულად დაადასტურა ინფორმაციის კვანტური დამუშავების უპირატესობები და თეორიულ ვარაუდებს წერტილი დაუსვა".

სამუშაო ჯგუფი სპეციალურად იმისთვის შეიქმნა, რომ ექსპერიმენტულად დაემტკიცებინათ კვანტური უპირატესობა. მათ შექმნეს ე.წ. კვანტური წრედი, რომელსაც რთული ალგებრული გამოთვლების ჩატარება შეუძლია. ამას კი ის უდევს საფუძვლად, რომ კვანტური სამყაროში რაიმე შეიძლება ერთდროულად ორ ადგილას არსებობდეს. არ ანერვიულდეთ, დიდი არაფერი.

ის კონკრეტული ფორმულა, რომელიც ამ ექსპერიმენტში გამოთვალეს, მეცნიერების მტკიცებით, შეუძლებელია, რომ კლასიკური პროცესორების გამოყენებით დამუშავდეს. მეტი დეტალებისთვის, თუ გაინტერესებთ კონკრეტულად როგორ მოხდა კვანტური უპირატესობის დემონსტრირება, სრულ ნაშრომსაც შეგიძლიათ გადახედოთ.

მაინც რას ნიშნავს ეს მიღწევა? იდეაში, ხელშესახები ჯერ მაინც არაფერი გაქვს. ეს ალგებრული გამოთვლა, რომელიც მკვლევარებმა გააკეთეს, არ არის რაიმე მისტიური, რომლის გადაწყვეტაც ჩვენს ცხოვრებას ახლავე შეცვლის. ამ ექსპერიმენტის მთავარი მიზანი, იმის მტკიცება იყო რომ კვანტური უპირატესობა რეალურია.

ამბავიც ეგაა. იმის ჩვენებით, რომ ის ადამიანები ცდებოდნენ, რომლებიც კვანტურ უპირატესობას ფანტაზიებს უწოდებდნენ, ჩვენ ბევრად უფრო მასშტაბურად, შეგვიძლია კვანტური კომპიუტერების პოტენციალის გააზრება.

ჩვენ ჯერ კიდევ ათწლეულები გვაშორებს იმ მომენტს, როდესაც კვანტური კომპიუტერები სამყაროს რეალურად შეცვლიან და ეს ყოველ ფეხის ნაბიჯზე ცხადი იქნება, თუმცა კვანტური უპირატესობის დადასტურება იმის გარანტიაა, რომ კვლევა სწორი მიმართულებით მიდის.

ქედი მოვიხაროთ იმ ჯგუფის წინაშე, ვინც ეს შეძლო. მეტი ინფორმაცია IBM-ის ბლოგზე შეგიძლიათ ნახოთ.