გორის ხელოვნების სახლი აცხადებს, რომ მუნიციპალიტეტის მერიას მათთან ხელშეკრულების შეწყვეტა უნდა. კულტურული ცენტრის ხელმძღვანელი ოთო გვრიტიშვილი რადიო თავისუფლებასთან საუბარში ამ გადაწყვეტილებას მიმდინარე გამოფენას უკავშირებს.
16 ნოემბერს ხელოვნების სახლის რეზიდენტებმა გახსნეს გამოფენა, რომელიც აერთიანებდა დამოუკიდებელი საქართველოს ისტორიის მანძილზე პროტესტის მონაწილეების მიერ გამოყენებულ ფრაზებს. მათ შორის იყო: "ნაომარი ქალაქი ბოდიშს არ იხდის".

ბოდიშის მოხდის საკითხი წინასაარჩევნო პერიოდში გააქტიურდა, როცა გორში მყოფმა ბიძინა ივანიშვილმა ამომრჩევლებისადმი მიმართვაში 2008 წლის ომზე საუბრისას თქვა:

"ჩვენ აუცილებლად გამოვძებნით საკუთარ თავში ძალას, რათა ბოდიში მოვიხადოთ იმის გამო, რომ დავალების შესაბამისად, მოღალატე ნაციონალურმა მოძრაობამ 2008 წელს ცეცხლის ალში გახვია ჩვენი ოსი დები და ძმები".