მსოფლიოში აღიარებულ ქართველ პიანისტს, ხატია ბუნიათიშვილს, რომელიც წელს "კლასიკური მუსიკის სუპერვარსკვლავად" მონათლეს, გამორჩეულად წარმატებული წელი ჰქონდა. ოქტომბერში მან თავისი რიგით მეექვსე სოლო ალბომი გამოუშვა, რომელშიც მოცარტის საფორტეპიანო კონცერტები შევიდა, სულ ახლახან კი პარიზის ღვთისმშობლის ტაძრის გახსნის საზეიმო ცერემონიაზეც დაუკრა.

ამ ყველაფრის ფონზე, მსოფლიო მედიის მხრიდან ბუნიათიშვილის პერსონით დაინტერესება ისევ გაიზარდა. ფრანგულმა ტელეარხმა Le Figaro-მ რამდენიმე დღის წინ ქართველ პიანისტზე ვრცელი, თითქმის 2-საათიანი გადაცემა მოამზადა, სადაც ინტერვიუერმა ხატიას ასოციაციური თამაში შესთავაზა: გადმოეცა ესა თუ ის ამბავი უსიტყვოდ, მუსიკით. როცა ჟურნალისტმა საქართველოში არსებული პოლიტიკური კრიზისი ახსენა, მუსიკოსი წამით დაფიქრდა, მერე კი იოჰან სებასტიან ბახის პრელუდია და ფუგის დაკვრა დაიწყო.

მოგვიანებით, ამავე ინტერვიუში, ბუნიათიშვილს ისევ ჰკითხეს მის სამშობლოში არსებულ მდგომარეობაზე, რის პასუხადაც პიანისტმა პროტესტის მონაწილეთა მიმართ მხარდაჭერა კიდევ ერთხელ გამოხატა.

"ქართველები თავისუფლების მოყვარე ხალხია და ამის გამო ყოველთვის ბრძოლა გვიწევდა", — აღნიშნავს ხატია, — "პარტიებს შორის ურთიერთობა პოლიტიკის ამბავია, მაგრამ მე ვხედავ ქართველ ახალგაზრდებს — და მე ახალგაზრდობას სამყაროში ყველაზე მშვენიერ რამედ მივიჩნევ — რომლებიც შეუპოვრად, თავგანწირვით იბრძვიან თავისუფლებისთვის, ევროპისთვის, საკუთარი უფლებების დასაცავად. ისინი აძლევენ ქვეყანას გეზს, ისინი წყვეტენ ქვეყნის მომავალს, ასე რომ, მათ სრულად ვუჭერ მხარს".

პროტესტის მონაწილეთა მხარდასაჭერი განცხადება ბუნიათიშვილმა რამდენიმე დღის წინაც გაავრცელა თავის სოციალურ ქსელებში. პიანისტმა განცხადებაში ძალოვანი უწყებების ძალადობრივი ქმედებებიც დაგმო.

"ისინი ჩვენს ლამაზ, თავისუფალ ახალგაზრდებს და ახალგაზრდული სულის ადამიანებს, რომლებსაც არ ამოძრავებთ არანაირი პოლიტიკური ინტერესი, არამედ მხოლოდ გულანთებული ქვეყნის სიყვარული და იმედი მათი უკეთესი მომავლის, სისასტიკით და გულგრილობით პასუხობენ. მთავრობა ხალხს ფიზიკურად უსწორდება და ავიწყდება, რომ მისი მოვალეობა თითოეული მოქალაქის დაცვაა. სახელმწიფო ადამიანებისგან შედგება და ერთი ადამიანი მთელი სახელმწიფოა", — დაწერა ქართველმა მუსიკოსმა.