დამოუკიდებელი თეატრალური პრემია თავისუფალი 2024-ის გამარჯვებულების ვინაობა უკვე ცნობილია. აღსანიშნავია, რომ დაჯილდოების საზეიმო ცერემონიის ნაცვლად, წელს გამარჯვებულები რუსთაველის გამზირზე, საპროტესტო აქციაზე, გამოვლინდნენ.

"საგულისხმოა, რომ პრემიის მფლობელები გამოვლინდნენ სწორედ იმ სივრცეში, სადაც ქართული საზოგადოება დღეს ქვეყნის თავისუფლებისთვისა და ჩვენი ევროპული მომავლისთვის იბრძვის", — ნათქვამია პრემიის მხარდამჭერი სამოქალაქო საზოგადოების ფონდის განცხადებაში.

რაც შეეხება გამარჯვებულებს, სია ასე გამოიყურება:

საუკეთესო სპექტაკლი

  • ნინო, ჩემი აფროდიტე — თეატრი ათონელზე (გამარჯვებული)
  • ბერსერკები II. მზიანი მხარე — საშემსრულებლო ხელოვნების ლაბორატორია
  • პათეტიკური მონოლოგები — თეატრალური კომპანია ჰარაკი
  • სიყვარული და ინფორმაცია — თეატრი ათონელზე
  • 1921-1924 — თეატრი სახელოსნო 42

საუკეთესო მსახიობი

  • ნატალია გაბისონია — პათეტიკური მონოლოგები (გამარჯვებული)
  • ბექა ხაჩიძე — ბერსერკები II. მზიანი მხარე (გამარჯვებული)
  • ანი იმნაძე — ლინეინის სილამაზის დედოფალი
  • თაკი მუმლაძე — ნინო, ჩემი აფროდიტე
  • ია სუხიტაშვილი — ნინო, ჩემი აფროდიტე

ფოტო: სამოქალაქო საზოგადოების ფონდი

საუკეთესო სცენოგრაფია

  • მიხეილ ჩარკვიანი — სიყვარული და ინფორმაცია (გამარჯვებული)
  • ქეთევან ნადიბაიძე — პათეტიკური მონოლოგები
  • თამრი ოხიკიანი — ნინო, ჩემი აფროდიტე
  • ტატო გელიაშვილი, თათა თავდიშვილი — ადამიანის ტრაგედია
  • ლევან კვარაცხელია — დარტყმა

პრემია თავისუფალი 2024-ის დიპლომი გადაეცა საქართველოში პირველი დამოუკიდებელი თეატრის ერთ-ერთ ფუძემდებელს, ლევან წულაძეს.

აღსანიშნავია, რომ ბოლო დღეებში განვითარებული მოვლენების ფონზე, ქართველი მსახიობების ნაწილი გაიფიცა და სპექტაკლებში მონაწილეობაზე უარი თქვა. მსახიობები გაფიცვით ქართული ოცნების მიერ ევროინტეგრაციის პროცესის შეჩერებას და დემონსტრანტებზე ძალადობას აპროტესტებენ.

რამდენიმე დღის წინ დააკავეს ცნობილი ქართველი მსახიობი ანდრო ჭიჭინაძეც. მას ბრალი ჯგუფურ ძალადობაში მონაწილეობის მუხლით წაუყენეს. დანაშაული სასჯელის სახედ და ზომად 4 წლიდან 6 წლამდე თავისუფლების აღკვეთას ითვალისწინებს. თავად მსახიობი ბრალს არ აღიარებს და ამბობს, რომ საქმე პოლიტიკურად მოტივირებულია, ოჯახი კი მიიჩნევს, რომ ჭიჭინაძის დაკავება "საჩვენებელი დასჯაა".

ანდრო ჭიჭინაძის დაკავების შემდეგ, 6 დეკემბერს, მსახიობებმა, რეჟისორებმა და ხელოვნებათმცოდნეებმა საპროტესტო აქციაც გამართეს თეატრალურ უნივერსიტეტთან და მარჯანიშვილის თეატრთან.

13 დეკემბერს სასამართლომ აქციაზე დაკავებული კიდევ ერთი მსახიობი, გიორგი ნაკაშიძე, დააჯარიმა, რასაც კრიტიკა მოჰყვა თეატრალური საზოგადოების, მათ შორის, რეჟისორ ქეთი დოლიძის მხრიდან.