მოდის სამყაროს ერთ-ერთ ყველაზე პრესტიჟულ ღონისძიებას, ლონდონის მოდის კვირეულს, სულ რაღაც ორი თვე გვაშორებს. კვირეული 20 თებერვლიდან 24 თებერვლის ჩათვლით გაიმართება და, ტრადიციულად, მსოფლიოს სხვადასხვა ქვეყნის საუკეთესო დიზაინერების ჩვენებებს მოუყრის თავს. მათი სია კი სულ ახლახან გახდა ცნობილი და ჩვენც შევიტყვეთ, რომ ლონდონის მოდის კვირეულზე ქართველი დიზაინერის, გიორგი ქებურიას, დებიუტი შედგება.

გიორგი ქებურიას მოდის სახლი, KEBURIA, ჩვენებას კვირეულის დასკვნით დღეს, 24 თებერვალს, გამართავს. ღონისძიებაზე 2025 წლის შემოდგომა-ზამთრის კოლექცია იქნება წარმოდგენილი.

ლონდონის მოდის კვირეული მოდის კვირეულების "დიდ ოთხეულის" ნაწილია ნიუ-იორკის, მილანისა და პარიზის მოდის კვირეულებთან ერთად.

რაც შეეხება გიორგი ქებურიას, იგი თვითნასწავლი დიზაინერია, რომელმაც პირველი კოლექცია 2010 წლის თბილისის მოდის კვირეულზე წარადგინა და საუკეთესო დამწყები დიზაინერის წოდებაც დაიმსახურა. 2015 წელს ქებურიამ საკუთარი ბრენდი შექმნა და საერთაშორისო ასპარეზზე გამოვიდა: ორი წლის შემდეგ მან კოლექცია ჯერ მილანის მოდის კვირეულზე წარადგინა, 2018 წელს კი KEBURIA-ის დებიუტი პარიზის მოდის კვირეულზეც შედგა.

დახვეწილი, კლასიკური სტილისა და სიურრეალისტური ესთეტიკის შერწყმით გამორჩეულმა ქართველმა დიზაინერმა მსოფლიო აღიარება მალევე მოიპოვა. ქებურიას სამოსი და აქსესუარები მოირგეს ისეთმა ვარსკვლავებმა, როგორებიც არიან პამელა ანდერსონი, კაილი ჯენერი, კენდალ ჯენერი, ჯიჯი ჰადიდი, რიანა, Lorde, ლინდსი ლოჰანი, მაილი საირუსი, კაია გერბერი და კამილა კაბეიო.