ევროკავშირმა TikTok-ის წინააღმდეგ რუმინეთის არჩევნებთან დაკავშირებით გამოძიება დაიწყო. გამოძიების მიხედვით, სოციალური მედიის პლატფორმამ, შესაძლოა, ევროკავშირის ციფრული წესდება დაარღვია რუმინეთის საპრეზიდენტო არჩევნებთან დაკავშირებულ რისკების გამკლავების პროცესში. ინფორმაციას ტაბულა ავრცელებს.

24 ნოემბერს გამართულ რუმინეთის საპრეზიდენტო არჩევნების პირველ ტურში პირველ ადგილზე დამოუკიდებელი პრორუსი კანდიდატი, კალინ ჯორჯესკუ გავიდა. ის კამპანიას ძირითადად სოციალურ ქსელ TikTok-ზე აწარმოებდა. იგი პლატფორმაზე აქტიურად ეწინააღმდეგებოდა უკრაინისადმი რუმინეთის დახმარებას და სკეპტიკურად არის განწყობილი NATO-სა და ევროკავშირის მიმართ.

6 დეკემბერს, რუმინეთის საკონსტიტუციო სასამართლომ არჩევნების პირველი ტურის შედეგები ანულირებულად გამოაცხადა მას შემდეგ, რაც გავრცელდა ინფორმაცია, რომ რუსეთი ჯორჯესკუს მხარდასაჭერ კოორდინირებულ ონლაინ კამპანიას აწარმოებდა.

გასაჯაროებული დოკუმენტების მიხედვით ცნობილი გახდა, რომ TikTok-ზე "ინფლუენსერებმა", ჯამში, $381 000-ის ოდენობის თანხა მიიღეს პლატფორმაზე ჯორჯესკუს მხარდასაჭერად.

TikTok-ი ბრალდებებს უარყოფს და აცხადებს, რომ კომპანიამ ევროკომისიას ვრცელი ინფორმაცია მიაწოდა იმ ძალისხმევის შესახებ, რასაც პლატფორმა ეწევა არჩევნების პერიოდში არსებულ რისკებთან გასამკლავებლად.

ბრალის დამტკიცების შემთხვევაში TikTok-ს მოუწევს ხარვეზების გამოსწორება ან ჯარიმის სახით წლიური გლობალური მოგების 6%-ის გადახდა.