სასამართლო სხდომაზე, სადაც მსახიობ გიორგი ნაკაშიძის საქმე განიხილებოდა, რეჟისორი ქეთი დოლიძეც მივიდა.

ნაკაშიძეს, რომელიც 3 დეკემბერს დააკავეს, წვრილმან ხულიგნობასა და პოლიციის დაუმორჩილებლობაში ედებოდა ბრალი. მოსამართლე ნინო ენუქიძის გადაწყვეტილებით, წვრილმან ხულიგნობაზე ადმინისტრაციული წარმოება შეწყდა და მსახიობი გამართლდა, თუმცა, იგი პოლიციელის დაუმორჩილებლობაში სამართალდამრღვევად ცნეს 2000-ლარიანი ჯარიმა დააკისრეს.

"ადამიანი ასე სასტიკად არ უნდა იყოს დაჯარიმებული", — განაცხადა ქეთი დოლიძემ ინტერპრესნიუსთან.

მოგვიანებით, რეჟისორი ნაკაშიძის გასამართლებას ფეისბუქზეც გამოეხმაურა.

"უსამართლობა არის ყველაზე საზარელი რამ, რაზეც არასოდეს გავჩუმდები", — დაწერა მან.

ქეთი დოლიძემ აქციებზე ძალადობრივი ქმედებები რამდენიმე დღის წინაც დაგმო ფეისბუქპოსტში.

"დასაჯეთ დამნაშავეები, თავგადახსნილი დადის ნახევარი თბილისი", — აცხადებს რეჟისორი, — "ბოროტებამ მოიცვა ყველაფერი. დასაჯეთ ამის შემსრულებლები. უარესს იმეორებთ".

თეატრალური საზოგადოების ნაწილი კი, უკვე რამდენიმე დღეა, გაფიცულია. მსახიობები სპექტაკლებში მონაწილეობაზე უარს ამბობენ. ისინი გაფიცვით ქართული ოცნების მიერ ევროინტეგრაციის პროცესის შეჩერებას და დემონსტრანტებზე ძალადობას აპროტესტებენ.

რამდენიმე დღის წინ დააკავეს ცნობილი ქართველი მსახიობი ანდრო ჭიჭინაძეც. მას ბრალი ჯგუფურ ძალადობაში მონაწილეობის მუხლით წაუყენეს. დანაშაული სასჯელის სახედ და ზომად 4 წლიდან 6 წლამდე თავისუფლების აღკვეთას ითვალისწინებს. თავად მსახიობი ბრალს არ აღიარებს და ამბობს, რომ საქმე პოლიტიკურად მოტივირებულია, ოჯახი კი მიიჩნევს, რომ ჭიჭინაძის დაკავება "საჩვენებელი დასჯაა".

ანდრო ჭიჭინაძის დაკავების შემდეგ, 6 დეკემბერს, მსახიობებმა, რეჟისორებმა და ხელოვნებათმცოდნეებმა საპროტესტო აქციაც გამართეს თეატრალურ უნივერსიტეტთან და მარჯანიშვილის თეატრთან.

სულ ცოტა ხნის წინ გახდა ასევე ცნობილი, რომ დამოუკიდებელი თეატრალური პრემია თავისუფალი წელს დაჯილდოების საზეიმო ცერემონიას არ გამართავს და ამის ნაცვლად გამარჯვებულებს საპროტესტო აქციაზე გამოავლენს.