აფხაზეთის თვითგამოცხადებული რესპუბლიკის პრემიერ-მინისტრის მოვალეობის შემსრულებელმა ვალერი ბგანბამ ჩერნომორენერგოს წარმომადგენლებს დაავალა ქართულ მხარესთან განიხილოს ელექტროენერგიის მიწოდების გაზრდის შესაძლებლობა. ამის შესახებ ინფორმაციას რადიო თავისუფლება აფსნიპრესზე დაყრდნობით ავრცელებს.

როგორც სააგენტო აფსნიპრესი წერს, საუბარია ზაფხულში მისაღები ელექტროენერგიის შემცირების ხარჯზე, ზამთრის ლიმიტის გაზრდაზე, როგორც კი ამის საშუალებას ენგურჰესის გამომუშავება მისცემს.

18 დეკემბერს კომპანია ინტერ რაოს გამგეობის წევრმა ალექსანდრა პანინამ ჟურნალისტებს განუცხადა, რომ რუსეთის ფედერაციიდან აფხაზეთისთვის ელექტროენერგიის მიწოდება ხდება კონტრაქტით გათვალისწინებულ წინასწარი გადახდის ფარგლებში, ამასთან ჯერ არ განიხილება კონტრაქტის 2025 წლისთვის გაგრძელების შესაძლებლობა.

პანინას სიტყვების კომენტირებისას აფხაზეთის დე ფაქტო მთავრობის წევრმა და ენერგეტიკის მინისტრმა, ჯანსუხ ნანბამ განაცხადა, რომ 30 ოქტომბერს რუსეთის ფედერაციის ენერგეტიკის სამინისტროს გაუგზავნეს ოფიციალური მოთხოვნა, რომელშიც მოითხოვეს 1 იანვრიდან სოციალური ნაკადის დაწყებას 2025 წლის დაგეგმილი მოცულობის ფარგლებში. თუმცა პასუხი არ მიუღიათ.

კრიპტოვალუტის მოპოვებამ, ენგურჰესის რეზერვუარში წყლის დაბალმა დონემ და რუსული ელექტროენერგიის კომერციულ ფასად გადახდის აუცილებლობამ აფხაზეთი ბოლო წლების ყველაზე მძიმე ენერგოკრიზისამდე მიიყვანა.

11 დეკემბრიდან აფხაზეთის მოსახლეობას დღისით დენი არასრული სამი საათის განმავლობაში, ხოლო ღამით 21.00-დან 07.00 საათამდე მიეწოდება. როგორც ადგილობრივი მედია წერს, ღამით მიღებული დენის ფასი უფრო იაფია, ვიდრე დღისით. 2024 წლის ნოემბრის დასაწყისიდან რუსული დენის შესაძენად სოხუმმა 600 მილიონ რუბლზე (5,8 მლნ დოლარი) მეტი დაიხარჯა.