წლის მიწურულს, ტრადიციულად, ოქსფორდის უნივერსიტეტის გამომცემლობამ დაასახელა სიტყვა, რომელიც გასული 2024-ის განწყობასა თუ ტრენდებს საუკეთესოდ ასახავს. ტერმინის გამოსავლენად, ხმის მიცემაში 37 ათასზე მეტი ადამიანი მონაწილეობდა და მათი გადაწყვეტილებით, 2024 წლის სიტყვად "ტვინის ლპობა" ("Brain rot") დასახელდა. აღნიშნული სოციალური ქსელებისა და უშინაარსო კონტენტის უსასრულოდ "სქროლვის" მზარდ ტენდენციას უსვამს ხაზს.

თავად გამომცემლობის განმარტებით, ტვინის ლპობა არის "ადამიანის მენტალური ან ინტელექტუალური მდგომარეობის გაუარესება, რომელიც მეტწილად უარსო და არაფრისმომცემი ონლაინ კონტენტის ჭარბი მოხმარების შედეგია".

ოქსფორდის უნივერსიტეტის გამომცემლობის განცხადებით, ამ ტენდენციის ფონზე, ტერმინმა "ტვინის ლპობამ" 2024-ში პოპულარობა ისევ მოიპოვა. თუმცა, როგორც ცნობილია, სიტყვათა ეს კომბინაცია პირველად ჰენრი დევიდ თორომ გამოიყენა თავის 1854 წელს გამოქვეყნებულ წიგნში უოლდენი ანუ ტყეში ცხოვრება.

ოქსფორდის ენების განყოფილების ხელმძღვანელი, კასპერ გრეთუოლი, ამბობს, რომ "ტვინის ლპობა" ვირტუალური ცხოვრების ერთ-ერთ საფრთხედ მიჩნეულ ასპექტს მიემართება და ტექნოლოგიებთან ჩვენი ურთიერთობის გადაფასებისკენ გვიბიძგებს.

"საოცარია, მაგრამ 'ტვინის ლპობას' ასევე იყენებს Gen Z და Gen Alpha, რომლებიც იმ ციფრული კონტენტის დიდ ნაწილს ქმნიან, ეს ტერმინი რომ მიემართება", — ამატებს გრეთუოლი.

"ტვინის ლპობასთან" ერთად კი, ოქსფორდის წლის სიტყვის ფინალში ასევე აღმოჩნდა ტერმინები "რომანტეზი" (რომანტიკისა და ფენტეზის ჟანრების ნაზავი, რომელიც ბოლო წლებში განსაკუთრებული პოპულარობით სარგებლობს) და "demure", რომელიც ტიკტოკის ზაფხულის ტრენდი გახლდათ.

როგორც წესი, ოქსფორდის წლის სიტყვად ისეთი ტერმინი ირჩევა, რომელსაც "კულტურულ ცხოვრებაზე ხანგრძლივი ზეგავლენის მოხდენის პოტენციალი" აქვს, ან ისტორიის კონკრეტულ მომენტს საუკეთესოდ ასახავს. სხვადასხვა დროს ოქსფორდის წლის სიტყვა გამხდარა "ვაქცინა" (2021), "კლიმატის კრიტიკული მდგომარეობა" (2019) და "სელფი" (2013). გასულ წელს ეს იყო საუბრულ ინგლისურში გამოყენებული სიტყვა Rizz, რომელიც ლექსიკონით განისაზღვრება, როგორც "პეწი, მიმზიდველობა ან ეშხი".