აზერბაიჯანის პრეზიდენტმა, ილჰამ ალიევმა განაცხადა, რომ საქართველოში ვითარება "სტაბილურობისკენ მიდის", რაც მისი აზრით — კარგია. იგი ქვეყანაში მიმდინარე მოვლენებში, საფრანგეთს პრეზიდენტის, ემანუელ მაკრონის კვალზე საუბრობს.

ამის შესახებ ალიევმა რუსეთის სამთავრობო პროპაგანდისტულ არხებთან: "სახელმწიფო ტელერადიო კომპანიისა" (ВГТРК) და "რია ნოვოსტისთან" (РИА Новости) ინტერვიუში ისაუბრა, რომელიც ტელეწამყვანმა დმიტრი კისელიოვმა ჩაწერა.

"კარგია, რომ ვითარება [საქართველოში] უკვე სტაბილიზაციის მიმართულებით მიდის. და აქაც, კიდევ ერთხელ, ხედავთ, რომ მაკრონის ყურები გამოჩნდა. კაცი თავის ქვეყანაში ვერ ისვენებს, უნდა, აუცილებლად შეძვრეს საქართველოში", — განაცხადა პრეზიდენტმა ალიევმა რუსეთის სამთავრობო მედიასთან ინტერვიუში.

ამავე ინტერვიუში ალიევმა აღნიშნა, რომ 2022 წლის 22 თებერვალს [უკრაინაში რუსეთის სრულმასშტაბიან შეჭრამდე ორი დღით ადრე] მისი და ვლადიმერ პუტინის მიერ რუსეთ-აზერბაიჯანის "სამოკავშირეო თანამშრომლობის შესახებ დეკლარაციის" ხელმოწერა დადებითი მოვლენა იყო.

"მას შემდეგ სიტუაცია ჩვენს რეგიონში და მსოფლიოში საკმაოდ შეიცვალა. მაგრამ ეს გავლენას ვერ ახდენს რუსეთ-აზერბაიჯანის თანამშრომლობაზე… ეს უფრო მაღალი ფორმაა თანამშრომლობის, იმის გათვალისწინებით, რომ მეზობელი ქვეყნები ვართ კავკასიასა და კასპიის ზღვის რეგიონში", — განაცხადა ალიევმა.

ამასთან, აზერბაიჯანის პრეზიდენტმა კირილოვთან საუბრისას მაკრონის ხელისუფლება სომხეთ-აზერბაიჯანის კონფლიქტში საფრანგეთის პოზიციების გამო არაერთხელ გააკრიტიკა, მათ შორის იარაღის მიწოდების გამო.

"იარაღი, რომელსაც მაკრონის მთავრობა აწვდის სომხეთს, არის თავდასხმითი იარაღი, ლეტალური იარაღი, რაც ტაქტიკურ საფრთხეს უქმნის აზერბაიჯანს", — განაცხადა მან.

ცნობისთვის, წლებია, რაც საფრანგეთსა და სომხეთს თბილი ურთიერთობები აქვთ, ხოლო აზერბაიჯანსა და საფრანგეთს — დაძაბული დიპლომატიური ურთიერთობები.

შეგახსენებთ, 7 დეკემბერს, პრეზიდენტმა მაკრონმა პარიზში, ახლად რესტავრირებული პარიზის ღვთისმშობლის ტაძრის გახსნაზე საქართველოს პრეზიდენტი, სალომე ზურაბიშვილი დაპატიჟა. ნოტრ-დამის გახსნას ესწრებოდა აშშ-ის არჩეული პრეზიდენტი, დონალდ ტრამპიც.

ამასთან, მაკრონმა 11 დეკემბერს, დემონსტრაციების დარბევისა და დაშლის და დაკავებისას დემონსტრანტების ცემაზე გავრცელებული ცნობების შემდეგ, საკუთარი ინიციატივით, ბიძინა ივანიშვილთან სატელეფონო საუბარი გამართა. საუბარი ერთ საათს გაგრძელდა.