ბანკების ასოციაციის პრეზიდენტის ალექსანდრე ძნელაძის შეფასებით, უახლოესი 12 თვის განმავლობაში, სამომხმარებლო სესხების აღება შემცირდება. ხელფასის შესაბამისად სესხის გაცემის შესახებ ეროვნული ბანკის რეგულაციებზე მან ტვ პირველის ეთერში, გადაცემა საქმიან დილაში ისაუბრა:

"რეალურად, ამ წესის იმპლემენტაციის შემდეგ, სწრაფად ვერ მოხდება ბანკების ადაპტაცია, შემოტრიალება და მოწყობა ამ რეჟიმზე. დღევანდელი გათვლებით, დაახლოებით, იმ ადამიანების 40-50% ვინც დღეს იღებდა სესხებს, მომავალში ვეღარ აიღებენ და ვინც აიღებს, მათთვისაც პროცედურა უფრო გაიწელება".

ბანკებისთვის ფიზიკური პირების დაკრედიტების წესის შესახებ რეგულაცია, სავარაუდოდ, პირველი ნოემბრიდან ამოქმედდება. ძნელაძის თქმით, კომპლექსურად შეიცვლება კრედიტის გაცემის პრინციპები.

საქართველოს ეროვნული ბანკის პროექტით, რაც უფრო ნაკლები შემოსავალი ექნება მსესხებელს, მით უფრო ნაკლები იქნება ყოველთვიურად სესხის დასაფარად გადასახდელი თანხა. თუ ხელფასი მსესხებელს 500 ლარამდე აქვს, ბანკმა სესხი ისე უნდა გადაანაწილოს, რომ პირს 15 პროცენტზე მეტის გადახდა არ მოუწიოს.

როგორი პროპორცია იქნება შემოსავალსა და ყოველთვიურ სასესხო გადასახადს შორის:

  • 500 ლარამდე - ყოველთვიურად გადასახდელი თანხა მაქსიმუმ 75 ლარი (15%);
  • 500 - 1 000 ლარამდე - ყოველთვიურად გადასახდელი თანხა 100-დან 200 ლარამდე (20%);
  • 1 000 - 2 000 ლარამდე - ყოველთვიურად გადასახდელი თანხა 250-დან 500 ლარამდე (25%);
  • 2 000 - 4 000 ლარამდე - ყოველთვიურად გადასახდელი თანხა 600-დან - 1 200 ლარამდე (30%);
  • 4 000 - 8 000 ლარამდე - ყოველთვიურად გადასახდელი თანხა 1 400-დან 2 800-მდე (35%);
  • 8 000 - 16 000 ლარამდე - ყოველთვიურად გადასახდელი თანხა 3 200-დან 6 400 ლარამდე (40%);
  • 16 000 ლარზე მეტი - ყოველთვიურად გადასახდელი თანხა 8 000 ლარზე მეტი (50%).

გაიგეთ მეტი: