ახალგაზრდა ქალი მეტროს მატარებელში მჯდომ კაცებთან მიდის, რომლებიც გაშლილი ფეხებით სხედან და მათ პლასტმასის ბოთლიდან სითხეს ასხამს.

სცენა რამდენჯერმე მეორდება. კაცები ქალის ქცევაზე ჯერ იბნევიან და შემდეგ ბრაზით პასუხობენ. ტექსტის მიხედვით, კაცები მენსპრედინგისთვის "ისჯებიან", რაც ფეხებგაშლილი ჯდომას ნიშნავს.

ინგლისურენოვანი ვიდეო ორი კვირის წინ In The Now-ს ფეისბუქ გვერდზე გამოქვეყნდა — ეს პლატფორმა კრემლისთვის მომუშავე გამოცემას, RT-ს [Russia Today] ეკუთვნის. გვერდს მსოფლიო მასშტაბით უამრავი გამომწერი ჰყავს და ვიდეო მალე გავირუსდა. მისი ჰედლაინი "ვებრძოლოთ მენსპრედინგს... მათეთრებლით" იყო. ვიდეოს ამ დროისთვის 6,4 მილიონი ნახვა აქვს.

სცენა რუსეთში, სანქტ-პეტერბურგის მეტროშია გადაღებული. ვიდეოს გმირი რუსულ ენაზე მოლაპარაკე ქალი ანა დოვალიუკია, რომელიც თავს სოციალურ აქტივისტს უწოდებს.

როგორც ჩანს, ბოთლში წყალში შერეული მათეთრებელია, რომელიც ლაქას ტოვებს. ზოგი ამბობს, რომ ვიდეოში ყველაფერი დადგმულია. მაგალითად, რუსული ჟურნალის Bumaga-ს სიტყვებით, ადგილზე მყოფმა ერთმა კაცმა თქვა, რომ "მსხვერპლის როლის" სათამაშოდ მას ფული გადაუხადეს.

ასე რომ, თუ ვიდეოში ნანახი სცენები დადგმულია და კრემლის მედიის მიერ მართული In The Now ამას ღიად აქვეყნებს, მაშინ რა დანიშნულება აქვს ინგლისურენოვან მკითხველებში ამ ვიდეოს გავრცელებას?

"რადიკალური ხედვების პროვოცირება", - წერს დეზინფორმაციასთან ბრძოლისთვის შექმნილი საიტი EUvsDisinfo.

და მართლაც, ვიდეოს მიზანი სწორედ ის კომენტარებია, რომლებიც მის ქვეშ ჩნდება. მომხმარებლები ე.წ. აქტივისტს აგრესიულ კომენტარებს უწერენ და მას ფემინიზმის სახედ აღიქვამენ.

"ეს პროტესტი კი არა, თავდასხმაა. იმედია, ვინმე მკერდზე მიასხამს ქლორს იმის გამო, რომ გამოწეული აქვს. ეს ზუსტად იგივეა", - არის ვიდეოს ტოპ-კომენტარი 15 ათასი მოწონებით.

სხვა სიტყვებით რომ ვთქვათ, ვიდეოში დადგმულია რადიკალიზმი, რომელიც ფემინისტური აქტივიზმითაა შეფუთული და ანტი-ფემინისტურ დამოკიდებულებებს აღვივებს.

ტროლების ქარხნის ხელწერა

სანქტ-პეტერბურგში მდებარე ცნობილი ტროლების ქარხანა რადიკალური შეხედულებების სხვადასხვა გზებით გავრცელებას ისახავს მიზნად.

2016 წელს ამერიკის საპრეზიდენტო არჩევნების დროს დაწესებულების მიზანი თანამშრომლების მხრიდან ამერიკელ აქტივისტებად თავის წარმოჩენა იყო, რომლებიც ტრამპის მხარდამჭერ მესიჯებს გაავრცელებდნენ.

2017 წელს დამოუკიდებელმა რუსულმა გამოცემამ RBC გამოძიება ჩაატარა და დაადგინა, რომ "რუსი ტროლები, რომლებიც სოციალურ მედიაში ამერიკელებად აჩვენებდნენ თავს, რეალურ აქტივისტებს აფინანსებდნენ, რათა საკამათო თემებზე საპროტესტო მოძრაობა წამოეწყოთ".

რუსეთის სამთავრობო არხის მესიჯი

ვიდეო და მისი გამოხმაურება იმ ნეგატიური მესიჯების ექოა ფემინიზმზე, MeToo მოძრაობასა და დასავლურ პოლიტკორექტიულობაზე, რომელიც რუსულ სამთავრობო ტელევიზიაში გამუდმებით ისმის.

მაგალითად, 2017 წლის 5 ნოემბერს, რუსეთის სამთავრობო ტელევიზიის წამყვანმა დიმიტრი კისილევმა, MeToo მოძრაობაზე ისაუბრა და თქვა, რომ "ადამიანების ცხოვრებაში რომანტიკული თავგადასავლები აღარ იარსებებს, რადგან ყველაფერს არასწორად იგებენ და ბინძურ შევიწროებას არქმევენ". კისილევის წინააღმდეგ EU-ს პერსონალური სანქციები აქვს დაწესებული.

კისილევმა 1 კვირის წინ, პირველ ოქტომბერს სექსუალურ შევიწროების წინააღმდეგ არსებული მოძრაობა დაავადებას შეადარა და თქვა, რომ "ავთვისებიანი ფემინიზმი" ამერიკიდან ვრცელდება და ევროპასა და რუსეთშიც იკიდებს ფეხს.

Russia Today-ის ქოლგის ქვეშ არსებული In The Now სოციალური მედიის კამპანიაა, რომელიც ვირუსულ ვიდეოებს ავრცელებს. ზოგი მათგანი პოლიტიკურ მესიჯებს შეიცავს, ზოგი — არა. მისი მსგავსი პროექტია ICMY. ორივე პროექტი ღიად არ ადასტურებს RT-სთან ურთიერთობას და იმ ფაქტს, რომ კრემლის მფლობელობის ქვეშაა.

როგორც მენსპრედინგზე გადაღებული ვიდეოდან ვხედავთ, In The Now წარმატებულად ახერხებს რუსეთის დეზიფორმაციული კამპანიის უფრო ფართო, საერთაშორისო აუდიტორიისთვის მიწოდებას. ვიდეოს მაყურებელთა უმრავლესობა კი, ვერც აცნობიერებს, რომ კრემლის პროპაგანდისტულ გზავნილებს ავრცელებს.