დღეს თბილისის საქალაქო სასამართლოში საქართველოს მე-3 პრეზიდენტის, მიხეილ სააკაშვილის სასამართლო პროცესი გაიმართა. 7 ნოემბრის საქმეზე ტელეკომპანია "იმედის“ ყოფილი მფლობელი, ბიზნესმენი ირაკლი რუხაძე დაიკითხა. რუხაძემ ტელევიზიის დარბევასა და მისი ყოფილი მფლობელის, ბადრი პატარკაციშვილის გარდაცვალებაზე ისაუბრა.

რუხაძის თქმით, პატარკაციშვილი "რუსთავი 2“-ის მიერ გავრცელებულ ფარულ ჩანაწერზე ნერვიულობას შეეწირა. რუხაძის მტკიცებით, ტელეკომპანიამ სპეციალური ოპერატიული დეპარტამენტის (სოდ) დირექტორის, ერეკლე კოდუას და ბადრი პატარკაციშვილის საუბრის ფარული ჩანაწერის დამონტაჟებული ვერსია გაუშვა:

"[იმედის დარბევის მერე] ბადრი პატარკაციშვილი იყო ინგლისში, რომელთანაც ურთიერთობა მქონდა სატელიტური ტელეფონით. საღამოს სახურავზე ავედი და დავურეკე. მითხრა, რაღაც გავუგზავნე [გიორგი] თარგამაძეს, უნდა გაუშვას და არ უშვებსო. მთხოვა, თარგამაძესთან მიდი და უთხარი, რომ გაუშვასო. მივედი თარგამაძესთან და მითხრა, "აუ, ირაკლი, იმიტომ არ ვუშვებ მაგ ჩანაწერს, რომ ნახო დამეთანხმები, რომ რისკიანია მისი გაშვებაო". მითხრა, "საღამოს მოდი და ერთად გადავწყვიტოთ მისი გაშვებაო"... მერე, დღის განმავლობაში ის ჩანაწერი გაუშვა "რუსთავი 2"-მა, ოღონდ გადაკეთებულად. ბადრიმაც მითხრა, ეს არის გადაკეთებული ჩანაწერიო. თქვა, რომ ამას ასე არ დავტოვებ და ვიბრძოლებო. რეალურად რაც მოხდა ისაა, რომ ფაქტობრივად, ამან ბადრი მოკლა...მე ვიცი, რომ თარგამაძეს მისცა პატარკაციშვილმა აუდიოჩანაწერი იმისთვის, რომ გაეშვა ეთერში.

გარდაცვალებამდე მე ვნახე ბადრი. ის იყო ღრმა დეპრესიაში, ტყეში დადიოდა, ოჯახს არ ელაპარაკებოდა. საკმაოდ შეცვლილი იყო," — განაცხადა რუხაძემ [IPN].

მიხეილ სააკაშვილი ირაკლი რუხაძის ჩვენებას სასამართლოზე გამოეხმაურა და განაცხადა, რომ ის იტყუება. საქართველოს მე-3 პრეზიდენტმა ისიც თქვა, რომ მისი ტყვეობა დროებითია და ის შევალ საქართველოს ისტორიაში, როგორც "მისი აღმაშენებელი", ისინი კი, როგორც "ტურები და გიენები".

"ტყუილია, არ იყო მონტაჟი. ტყუილებს ნუ ლაპარაკობ! მას შემდეგ, რაც პატარკაციშვილი მხილებულ იქნა სახელმწიფო გადატრიალების მცდელობაში, ეს დაიჯერეს მისმა ჟურნალისტებმა და დახურეს თავად ტელევიზია. სააკაშვილთან რა პრეტენზია გაქვთ? ბადრი პატარკაციშვილმა დახურა ტელევიზია, მას შემდეგ, რაც არ დაემორჩილნენ მისი ჟურნალისტები, წერტილი. თქვენ ამბობთ, რომ ბადრი პატარკაციშვილი არ იყო პოლიტიკური ფიგურა, შეგახსენებთ 2007 წელს მის მიერ გაკეთებულ განცხადებას "ყველაფერს ვიღონებ, სააკაშვილის ფაშიზმის დასამხობად!" არის თუ არა ეს პოლიტიკური განცხადება?

ამ კაცის დაკითხვით დადგინდა ის, რომ კაცმა, რომელმაც წააგო ჩემთან სასამართლო, თქვა, რომ ბადრი პატარკაციშვილმა დახურა ტელევიზია, იმის გამო, რომ მის წინააღმდეგ წავიდნენ ჟურნალისტები.

თქვენ წახვალთ ისევ იმ სოროში, საიდანაც ივანიშვილს მოახსენებთ, როგორც შეასრულეთ თქვენი დავალება დღეს სასამართლოში. თქვენ შეხვალთ სოროში. ეს არის ივანიშვილის კენგურუს სასამართლო. ჩემი ტყვეობა დროებითია და მე შევალ საქართველოს ისტორიაში, როგორც მისი აღმაშენებელი, თქვენ შეხვალთ, როგორც ტურები და გიენები," — განაცხადა სააკაშვილმა [IPN].

2008 წლის 12 თებერვალს ბადრი პატარკაციშვილი დიდ ბრიტანეთში, საკუთარ სახლში, 52 წლის ასაკში გარდაიცვალა. ბრიტანელი სამართალდამცველებისა და ექსპერტების ოფიციალური დასკვნით, გარდაცვალების მიზეზი გულის უეცარი შეტევა გახდა.

დღევანდელ სასამართლო პროცესზე 2007 წლის დეკემბერში გავრცელებულ ფარულ აუდიოჩანაწერზე ისაუბრეს, რომელშიც ლონდონში ბადრი პატარკაციშვილისა და სოდ-ის უფროსის, ერეკლე კოდუას საუბარია ასახული.

პროკურატურის ვერსიით, პატარკაციშვილი კოდუას 100 მილიონ დოლარს სთავაზობდა, სანაცვლოდ კი 2008 წლის იანვრის არჩევნების შემდეგ შს მინისტრ ვანო მერაბიშვილის ჩამოშორებასა და ძალოვნების ნეიტრალიტეტს ითხოვდა, რაც ხელისუფლებამ სახელმწიფო გადატრიალების მცდელობად შეაფასა. პატარკაციშვილი და მისი გარემოცვა აღნიშნულ ვერსიას უარყოფდნენ და ამტკიცებდნენ, რომ ტელეეთერით ჩანაწერის დამონტაჟებული ვერსია გავრცელდა.