საქართველოს პრეზიდენტობის კანდიდატის სალომე ზურაბიშვილის განცხადებით, ის გაეცნო სხვა პრეზიდენტობის კანდიდატებს და სჯერა, რომ მმართველი პარტიის მხარდაჭერის შანსები აქვს. ამის შესახებ ზურაბიშვილმა ტელეკომპანია პირველის ეთერში განაცხადა.

პრეზიდენტობის კანდიდატის თქმით, თუ ქართული ოცნება საკუთარ კანდიდატს დაასახელებს ის მზად არის ამ კანდიდატთან ერთად კონკურენციაში ჩაებას.

"კანდიდატებს გადავხედე. ამპარტავნობა რომ არ გამომივიდეს, ყველას თუ არ ვჯობივარ, გარკვეული შანსები მაქვს ვიყო ის დამოუკიდებელი კანდიდატი, ვისაც მხარს დაუჭერენ", - განაცხადა სალომე ზურაბიშვილმა.

მისი თქმით, ქართული ოცნების მხარდაჭერის იმედს აძლევს მმართველი პარტიის არჩევანი წინა საპრეზიდენტო არჩევნებზე.

"არჩევანი, რომელიც გაკეთდა მარგველაშვილზე ალბათ არ გაამართლა და ესეც არის ალბათ ჩემთვის ერთი ნაწილი ამ იმედის, რომ მე სხვანაირი ტიპის კანდიდატი ვარ", - განაცხადა სალომე ზურაბიშვილმა.

საქართველოს პარლამენტის თავმჯდომარის განცხადებით, ქართული ოცნება საპრეზიდენტო კანდიდატზე სავარაუდოდ, 8 სექტემბრის შემდეგ განაცხადებს.

საპარლამენტო უმრავლესობის წევრმა, არჩილ თალაკვაძემ განაცხადა, რომ ქართული ოცნება საპრეზიდენტო არჩევნებში საკუთარ კანდიდატს არ დაასახელებს.

იდეა, რომ ქართულ ოცნებას საპრეზიდენტო კანდიდატი არ ჰყავდეს, პარტიის თავმჯდომარეს ბიძინა ივანიშვილს ეკუთვნის. მან პირველ არხთან ინტერვიუში განაცხადა, რომ ეს პოზიცია კონსულტაციების დაწყების პირველი დღიდან ჰქონდა.

ბიძინა ივანიშვილს დაეთანხმა საქართველოს პრემიერ-მინისტრი მამუკა ბახტაძე და განაცხადა, რომ უფრო დემოკრატიული იქნებოდა, თუ ქართულ ოცნებას საპრეზიდენტო არჩევნებში კანდიდატი არ ეყოლებოდა.

გავრცელებული ინფორმაციით, ქართულმა ოცნებამ არჩევნებში მხარი შესაძლოა დამოუკიდებელ კანდიდატს სალომე ზურაბიშვილს დაუჭიროს, თუმცა მამუკა ბახტაძემ განაცხადა, რომ გუნდში არსებობს პოზიცია საპრეზიდენტო კანდიდატის აუცილებლად დაყენებასთან დაკავშირებით.