პრემიერ-მინისტრმა მამუკა ბახტაძემ დღეს, 21 აგვისტოს ჟურნალისტებთან საუბრისას თქვ, რომ მმართველ გუნდში პრეზიდენტობის კანდიდატთან დაკავშირებით ორი განსხვავებული პოზიცია არსებობს:

"ორივე პოზიციას აქვს თავისი არგუმენტები. ჩვენ გვაქვს კონსტიტუციური უმრავლესობა პარლამენტში და შეიძლება ჩვენი დემოკრატიული განვითარებისთვის უკეთესი იყოს ის, რომ საპრეზიდენტო არჩევნებში არ მიიღოს მმართველმა ძალამ მონაწილეობა. ამასთან ერთად, არსებობს პოზიცია, რომ პარტია აუცილებლად უნდა იყოს წარმოდგენილი თავისი კანდიდატით".

მამუკა ბახტაძის თქმით, გუნდი ჯერ კიდევ აკვირდება მოვლენებს და დარეგისტრირებულ კანდიდატებს:

"გუნდში მიმდინარეობს არამხოლოდ კომუნიკაცია, არამედ, მე ვიტყოდი, დისკუსია. ქართული ოცნების ფილოსოფია გახლავთ საპარლამენტო დემოკრატიისა და საპარლამენტო რესპუბლიკის მშენებლობა".

საპრეზიდენტო არჩევნები 28 ოქტომბერს გაიმართება. მმართველმა პარტიამ რამდენიმე კვირის წინ გაავრცელა განცხადება, რომ მათ პარტიული კანდიდატი არ ეყოლებათ. პარლამენტის ვიცე-სპიკერმა, გია ვოლსკიმ განაცხადა, რომ გუნდში მიმდინარეობს მსჯელობა, რომ ან სალომე ზურაბიშვილს დაუჭერენ მხარს, ან საერთოდ არ ჩაერევიან ამ პროცესში.