"ჩვენი დემოკრატიისთვის იქნება უკეთესი, რომ ქართულ ოცნებას არ ჰყავდეს საკუთარი კანდიდატი საპრეზიდენტო არჩევნებზე", - ასე გამოეხმაურა პრემიერ-მინისტრი მამუკა ბახტაძე ოქტომბრის საპრეზიდენტო არჩევნებს.

მისი განმარტებით, მნიშვნელოვანია, რომ პარტიამ ყველა პოლიტიკურ აქტივობაში მიიღოს მონაწილეობა, თუმცა ქართული ოცნების "ფილოსოფიაა ნამდვილი ევროპული საპარლამენტო დემოკრატიის" შექმნა.

"ქართულ ოცნებას აქვს კონსტიტუციური უმრავლესობა და, თითქმის, ყველა ადგილობრივ თვითმმართველობაში ქართულ ოცნებას აქვს უმრავლესობა", - თქვა ბახტაძემ.

საზოგადოებრივი მაუწყებლისთვის მიცემულ ინტერვიუში ბიძინა ივანიშვილმა განაცხადა, რომ მისი პოზიციაა, საპრეზიდენტო კანდიდატი გუნდიდან არ დაასახელონ.

"თუ გვსურს რომ საქართველო დემოკრატიული მიმართულების სწრაფად განვითარდეს და დემოკრატიული ინსტიტუტებიც გაღრმავდეს, მე პოზიცია მაქვს, რომ გუნდიდან არ დავასახელოთ საპრეზიდენტო კანდიდატი", - თქვა ბიძინა ივანიშვილმა.

მისი თქმით, მისი პოზიციაა, რომ დამოუკიდებელ ღირსეულ კანდიდატს დაუჭირონ მხარი და თუ ასეთი არ იქნება, არავის დაუჭირონ მხარი და "ოპოზიციამ გაინაწილოს ეს ინსტიტუტი".